«Los nuestros güelos nun nos falaren de la guerra, tampoco los nuestros padres nos falaren, por prudencia o por desidia o porque andaben a otres coses, asina que diérennos el mandáu de callar o d'inventar la nuestra guerra con retayos dispersos de la suya.
Sé que mio padre yera un guaje y que pasó tres díes y tres nueches nuna cabaña en monte, nel mes de febreru con fame y mieu y tiritando. (...) Sé que mio güelu volvía fugáu pa en casa na espantada final, cuando cayó l'últimu frente, a pie, solu ente la biesca, y sintió ente los matos unos ruios y pensó que lu mataben ellí mesmo. Pero yera namás una rapaza, una rapaza con dos simples llaranxes, una en cada mano, y aquellas llaranxes brillaben como güevos de colores xigantes ente la ñebla. Eso foi lo que nos contó mio güelu de la guerra. Y'l sabor d'aquelles llaraxes tovía dura. (...)
