ESTHER GARCÍA, ESCRITORA
«Un poema que cobra vida musical abre fronteres; ye un llinguax universal»
«Nun me gusta la monotonía y préstame la variedá que nos trai cada estación y tolos efectos que se perciben na nuesa tierra y que van alimentandos imáxenes sensoriales»
19.02.08 -
AUTORA. Esther García, ayeri n'Avilés. / TANIA
Esther García ye una de les escritores asturianes más comprometíes cola llingua y la lliteratura d'Asturies. Ye llicenciada en pedagoxía, maestra y miembru correspondiente de l'Academia de la Llingua Asturiana. El so nuevu trabayu, tituláu 'Faraguyas' vien a ser un potaxe exóticu: haikus n'Asturianu dedicaos a les estaciones del añu. Fai pocos meses tamién vio parte de la so obra poética fecha música y espublizada nun discu, gracies al trabayu d'Ernesto Paredano y David Menéndez.
-Haikus en llingua asturiana, ¿cómo se come eso?
-Cuando yera una mozuca dicíenme que parecía una xaponesina. Y, mira tú qu'agora tuvi una rellación lliteraria col Xapón. Quién sabe si'l subconsciente me lleva per allá alantrón. Haikus n'asturianu, una novedá, nun cabe dulda. Enfotéme nesta xera poética d'escribir un llibru de versos al estilu de los haikus. Fui poco a poco recoyendo 'faraguyas' de la Naturaleza y colocándoles con procuru nesta riestra de poeminos que podréis saboriar nesti llibru.
-El llibru trai 'Versos pequeños pa nenos grandes' tamién paez una declaración de principios
-Y pue selo. Prestóme esti xuegu de palabres porque igual que los haikus, esta frase condensa en poques palabres un mensax fondu. Los haikus son poemes breves pero que dicen munches coses a los llectores. Magar paezan poemes cenciellos son 'faraguyas' que tienen 'muncha miga', por eso les persones de cualquier edá puen sentise felices lleendo un haiku.
-¿Por qué dedicar poesíes a les estaciones del añu?
-Yo soi una persona qu'observo abondo la Naturaleza, y los cambios estacionales influyen nel mio estáu d'ánimu. Nun me gusta la monotonía y préstame la variedá que nos trai cada estación y tolos efectos que se perciben na nuesa tierra y que van alimentando distintes imáxenes sensoriales. Gústame estrenar coses nueves y cada estación trainos dalgo distintu qu'enllena la vida de nueves ilusiones.
-Con esto del 'calentamientu global' les estaciones cada vez tan más emborronaes, con menos carauterístiques propies
-Esto ye un tema preocupante a nivel mundial. Tamos acabando con too, y nosotros, polo que nos toca, acabaremos estrozando la guapura que la Naturaleza nos brinda. Y nun dexa de ser otra forma más d'uniformanos. Paez que tamos gafaos. Ente l'aculturación que sufrimos, y los cambios climáticos perderemos l'encantu d'esta nuesa tierra.
-Usté tien una llarga trayectoria: narrativa, poesía, didáutica ¿Ónde ta más cómoda?
-Nun sabría dicítelo. Cuando escribo poesía siéntome satisfecha, préstame, y resúltame fácil escribir versos. Didáctica: tantos años entregada a la enseñanza, nun puedo negar que facer coses que puedan motivar a los nenos y ayudalos a deprender ye pa mí mui gratificante y fáigolo con gustu. No que ye narrativa tamién me siento cómoda. Acabo de ganar dos premios de narrativa, y eso tamién m'anima a siguir escribiendo.
-Cola so esperiencia n'educación, ¿cree que los neños d'anguaño van ser los que llogren, de mayores, el reconocimientu de la Llingua?
-Yo soi una persona optimista, pero nun m'atrevo a predicir el futuru, anque seya un poco bruxa. Güei inda sufrimos munchos prexuicios heredaos qu'espero nun van dase nos más xóvenes, porque'l trabayu fechu en dalgo se tien que notar. Esperemos que los que lleguen al poder seyan más abiertos y más sensibles a la realidá llingüística y cultural d'Asturies. Pero esto ye más bien un deséu. Nun se sabe lo que nos traerá'l futuru.
Pola Llingua
-Hai delles persones que creen que los escritores nun s'impliquen bastante col reconocimientu del asturianu, ¿qué más pueden facer los escritores pola Llingua?
-Escribir n'asturianu ye de por sí una forma de manifestase y reivindicar la esistencia de la llingua. Soi de les que pienso que tenemos qu' escribir de tolos temes n'asturianu y asina lo faigo, esa ye una forma de dignificalu. Nun voi opinar de lo que faen otros escritores, pero yo voi chufame un poco. Dende hai más d'un cuartu de sieglu entreguéme en cuerpu y alma y en toles estayes posibles a trabayar pola recuperación de la llingua. Tengo bona conciencia.
-¿Sigue faltando sitiu pa la Llingua nos medios de comunicación?
-Sí, porque lo qu'hai ye testimonial. Somos cuatro los que tenemos el privilexu de poder escribir na prensa n'asturianu, y otros cuatro los que puen facer dalgo na televisión, radio y demás. Nun atopo esplicación dalguna pa que los mesmos partíos que n'otres comunidaes potencien l'espardimientu y normalización llingüística, n'Asturies nos dean el culu, sabiendo qu'hai un altu porcentaxe d'asturianos que demanden la so presencia en tolos sectores sociales. Nun hai argumentu posible pa esta negativa.
-Volviendo a la so obra, dalgunos de los sos poemes acaben d'asoleyase nel discu 'Alebrix'. ¿Cómo foi la esperiencia?
-Pa mí foi dalgo mui importante, hai que tener en cuenta qu'un poema que cobra vida musical abre fronteres, pues la música ye un llinguax universal. Sentime mui emocionada, porque foi el mio fíu Ernesto quien me dedicó esti trabayu, un compositor mui mozu y que pienso que llegará mui lloñe. Quedé tamién mui contenta de la interpretación que fai'l barítonu David Menéndez, con esa voz que nos fai vibrar, mui compenetráu col pianista que tamién ye Ernesto Paredano. Creo que ye una novedá y una gran aportación al panorama musical asturianu. Un trabayu redondu.
-¿Qué proyeutos tien pa estos próximos meses?
-Esti añu van salir dos llibros nuevos, el poemariu Pisadas, Premiu Uviéu de poesía (2007) que saldrá n'abril y llueu pa ochobre publícase'l rellatu La maestra , Premiu Xosé Álvarez convocáu pol Centru Asturianu de Madrí y que publica'l Conseyu de Comunidaes Asturianes. Proyeutos, siguir escribiendo y a ver si determino la tesis que tengo aparcada poles estanteríes.
-Haikus en llingua asturiana, ¿cómo se come eso?
-Cuando yera una mozuca dicíenme que parecía una xaponesina. Y, mira tú qu'agora tuvi una rellación lliteraria col Xapón. Quién sabe si'l subconsciente me lleva per allá alantrón. Haikus n'asturianu, una novedá, nun cabe dulda. Enfotéme nesta xera poética d'escribir un llibru de versos al estilu de los haikus. Fui poco a poco recoyendo 'faraguyas' de la Naturaleza y colocándoles con procuru nesta riestra de poeminos que podréis saboriar nesti llibru.
-El llibru trai 'Versos pequeños pa nenos grandes' tamién paez una declaración de principios
-Y pue selo. Prestóme esti xuegu de palabres porque igual que los haikus, esta frase condensa en poques palabres un mensax fondu. Los haikus son poemes breves pero que dicen munches coses a los llectores. Magar paezan poemes cenciellos son 'faraguyas' que tienen 'muncha miga', por eso les persones de cualquier edá puen sentise felices lleendo un haiku.
-¿Por qué dedicar poesíes a les estaciones del añu?
-Yo soi una persona qu'observo abondo la Naturaleza, y los cambios estacionales influyen nel mio estáu d'ánimu. Nun me gusta la monotonía y préstame la variedá que nos trai cada estación y tolos efectos que se perciben na nuesa tierra y que van alimentando distintes imáxenes sensoriales. Gústame estrenar coses nueves y cada estación trainos dalgo distintu qu'enllena la vida de nueves ilusiones.
-Con esto del 'calentamientu global' les estaciones cada vez tan más emborronaes, con menos carauterístiques propies
-Esto ye un tema preocupante a nivel mundial. Tamos acabando con too, y nosotros, polo que nos toca, acabaremos estrozando la guapura que la Naturaleza nos brinda. Y nun dexa de ser otra forma más d'uniformanos. Paez que tamos gafaos. Ente l'aculturación que sufrimos, y los cambios climáticos perderemos l'encantu d'esta nuesa tierra.
-Usté tien una llarga trayectoria: narrativa, poesía, didáutica ¿Ónde ta más cómoda?
-Nun sabría dicítelo. Cuando escribo poesía siéntome satisfecha, préstame, y resúltame fácil escribir versos. Didáctica: tantos años entregada a la enseñanza, nun puedo negar que facer coses que puedan motivar a los nenos y ayudalos a deprender ye pa mí mui gratificante y fáigolo con gustu. No que ye narrativa tamién me siento cómoda. Acabo de ganar dos premios de narrativa, y eso tamién m'anima a siguir escribiendo.
-Cola so esperiencia n'educación, ¿cree que los neños d'anguaño van ser los que llogren, de mayores, el reconocimientu de la Llingua?
-Yo soi una persona optimista, pero nun m'atrevo a predicir el futuru, anque seya un poco bruxa. Güei inda sufrimos munchos prexuicios heredaos qu'espero nun van dase nos más xóvenes, porque'l trabayu fechu en dalgo se tien que notar. Esperemos que los que lleguen al poder seyan más abiertos y más sensibles a la realidá llingüística y cultural d'Asturies. Pero esto ye más bien un deséu. Nun se sabe lo que nos traerá'l futuru.
Pola Llingua
-Hai delles persones que creen que los escritores nun s'impliquen bastante col reconocimientu del asturianu, ¿qué más pueden facer los escritores pola Llingua?
-Escribir n'asturianu ye de por sí una forma de manifestase y reivindicar la esistencia de la llingua. Soi de les que pienso que tenemos qu' escribir de tolos temes n'asturianu y asina lo faigo, esa ye una forma de dignificalu. Nun voi opinar de lo que faen otros escritores, pero yo voi chufame un poco. Dende hai más d'un cuartu de sieglu entreguéme en cuerpu y alma y en toles estayes posibles a trabayar pola recuperación de la llingua. Tengo bona conciencia.
-¿Sigue faltando sitiu pa la Llingua nos medios de comunicación?
-Sí, porque lo qu'hai ye testimonial. Somos cuatro los que tenemos el privilexu de poder escribir na prensa n'asturianu, y otros cuatro los que puen facer dalgo na televisión, radio y demás. Nun atopo esplicación dalguna pa que los mesmos partíos que n'otres comunidaes potencien l'espardimientu y normalización llingüística, n'Asturies nos dean el culu, sabiendo qu'hai un altu porcentaxe d'asturianos que demanden la so presencia en tolos sectores sociales. Nun hai argumentu posible pa esta negativa.
-Volviendo a la so obra, dalgunos de los sos poemes acaben d'asoleyase nel discu 'Alebrix'. ¿Cómo foi la esperiencia?
-Pa mí foi dalgo mui importante, hai que tener en cuenta qu'un poema que cobra vida musical abre fronteres, pues la música ye un llinguax universal. Sentime mui emocionada, porque foi el mio fíu Ernesto quien me dedicó esti trabayu, un compositor mui mozu y que pienso que llegará mui lloñe. Quedé tamién mui contenta de la interpretación que fai'l barítonu David Menéndez, con esa voz que nos fai vibrar, mui compenetráu col pianista que tamién ye Ernesto Paredano. Creo que ye una novedá y una gran aportación al panorama musical asturianu. Un trabayu redondu.
-¿Qué proyeutos tien pa estos próximos meses?
-Esti añu van salir dos llibros nuevos, el poemariu Pisadas, Premiu Uviéu de poesía (2007) que saldrá n'abril y llueu pa ochobre publícase'l rellatu La maestra , Premiu Xosé Álvarez convocáu pol Centru Asturianu de Madrí y que publica'l Conseyu de Comunidaes Asturianes. Proyeutos, siguir escribiendo y a ver si determino la tesis que tengo aparcada poles estanteríes.
