Borrar
Cultura

Yérase una vez... la obligatoriedá

VICENTE GARCÍA OLIVA

Martes, 10 de junio 2008, 04:35

Necesitas ser suscriptor para acceder a esta funcionalidad.

Compartir

TENÍAME prometío a mí mesmu nun volver a escribir sobre'l tema de la oficialidá de la llingua asturiana. Un poco por lo de: «Qué tiempos estos nos que hai que lluchar polo evidente», y otro poco porque, depués de tantos años repitiendo argumentos pa los que nun quieren escuchalos, llega a cansar. Un, nun ye de piedra. Pero l'acumulación de tópicos defensivos (¡manda güevos, defendese d'un bien cultural!) en boca y papel de los últimos de Filipines de la FSA/Gobiernu Asturianu, nun me dexa dormir en paz, y ya sabemos que ye mui importante descansar peles nueches.

Sé qu'ésti ye un escritu inútil, una perda de tiempu y papel, porque como bien diz el refrán popular: «Nun hai peor sordu que'l que nun quier oyer», pero que nun se pueda decir dalgún día que la llingua asturiana morrió porque naide la defendiere.

Vamos a ver, ho. Claro que la oficialidá de la llingua supón obligatoriedá. Faltaría más que nun fuera asina. La Oficialidá tendría que constituyise con un actu llegal, supongo que a traviés d'una Llei, y les Lleis tán pa cumplise. ¿Si non pa qué valen? Pero esa Llei, al qu'obliga ye al que la promulga, o seya al Estáu, o nel ámbitu en que representa al Estáu, a la Comunidá que-y correspuenda.

Quier esto decir, en román paladino, que la oficialidá de la llingua asturiana NUN obliga al so usu (¡faltaría más!) por parte de nengún particular, persona o cosa (suponiendo qu'una cosa pudiere ser particular). O seya que NUN s'obliga a nadie a falar, escribir, conocer, apreciar u odiar a la nuestra llingua. Ca ún ye llibre de facelo o non, según Dios, o l'ácidu ribonucléicu-y lo dio a entender. Pero eso sí, EL QUE QUIERA UTILIZALA, tien de poder facelo ensin que l'Administración se niegue. Yo puedo empobiname a l'Administración, en cualquiera de los sos ámbitos, igual n'asturianu que'n castellán. Por tanto la OBLIGATORIEDÁ ye pa l'Administración, que pa eso son les Lleis.

Imaxinemos la Llei del Divorciu. Evidentemente qu'esista una Llei de Divorciu nun quier decir que TOOS tengamos que nos divorciar (menudu xaréu), sinón qu'aquellos que quieran, puedan facelo, porque tienen esi derechu reconocíu por Llei, y l'Administración nun podría deci-y a esa persona: «Non, a usté non lu dexo divorciase porque nun me da la gana». Lóxicamente, la Administración sí ta OBLIGADA a cumplir la Llei, nos términos nos qu'ésta té desarrollada.

L'argumentu, pues, de que la Oficialidá de la Llingua Asturiana supondría una imposición pa dalguna xente, ye dafechamente FALSU. A naide que nun quixera emplegala se-y podría obligar. Y que, en cambiu, sí obligue a l'administración, paez que ye lo mínimo que debe esixise pa respetar los drechos d'una parte de la población asturiana que sí la quier emplegar.

Escondese, pues, nel bunker, aludiendo con medies pallabres confuses, a una supuesta obligatoriedá, oponiéndola a una «voluntariedá» (la de la xente que nun quier utilizala) que toos defendemos, ye querer engañar al personal. Y dalgunos tamos yá mui mayores pa que nos sigan contando cuentos. Díxolo el mio admiráu León Felipe y repítolo yo: «Que nun mos duerman con cuentos».

Reporta un error en esta noticia

* Campos obligatorios