14.10.08 -
Foi en 1944, en plena batalla de Les Ardenes, cuando naquel pinar escuru se reatoparon, depués cinco llargos años, John Bouck y Christian Slape. Cuasi nun-yos dio tiempu pa mirase: a la media hora de que Bouck llegara al puestu, treslladáu dende París, entamó'l fueu enemigu a bramar. Slape, depués de que los cañones alemanes sutrumieran el puestu cuasi trece hores, tarreció pola vida de Bouck; lo mesmo-y sucedió a Bouck, qu'imaxinó'l cuerpu de Slape cubiertu por mozgazos y afogáu de sangre.
Esto cuéntamelo Jonh Bouck nuna tabierna de Xixón. Pasaron yá munchos años, demasiaos, pero inda remembra, con cierta intensidá, el tráfagu d'aquellos díes. Ta acabante venir a la Selmana Negra de Xixón. Quería ver cómo pintaba esto y fálame, con muncha coña, d'un ex marine que diz que torturó a nun sé cuántos iraquís na última Guerra del Golfu.
-Yo sí tenía qu'escribir un llibru,asegura mentes apura los últimos rellumos de la tarde reflexaos nel fondu del vasu del whisky.
¿En qué midida l'azar condiciona la vida de nueso? Nunca lo sabremos con exactitú. ¿Cuántes posibilidaes había que dos mozos del mesmu pueblu de Nebraska, que nacieran una casa frente a la otra, s'atoparan nuna guerra n'Europa, nel primer fogaxe de la batalla de les Ardenes?
-Nenguna -asegura Bouck y anecia triste-: nenguna.
Slape y Bouck yeren dos de los deciocho soldaos americanos que resistieron tres díes el bombardéu de l'artillería nazi nel primer episodiu d'aquella última tentativa de Hitler de recuperar l'espaciu perdíu. Dieciocho soldaos que provocaron nel enemigu quinientes baxes y que foron finalmente apresaos y treslladaos a un campu de concentración. Namás se rindieron cuando quedaron ensin munición.
Depués vieno un llargu añu nel campu de concentración. Bouck y Slape incluso llegaron a collaborar nun intentu de fuga. Uníos a un mesmu destín, detuviéronlos y torturáronlos; Bouck almiró'l valor de Slape; supo que Slape siguía odiándolu tanto como él lo facía.
-Esta hestoria resuélvese munchos años depués. Quixi escaecer, pero nun pudi. Pasé venti años na cárcel y agora, dígote la verdá, volvería a facer lo mesmo.
