28.10.08 -
Los motes, sobrenomes o alias definen y fain reconocible a les presones, pero hai xente que nun pue arrecostinar con esta costume tradicional. Ye lo que-y asocedió al protagonista -un indianu mal encaráu que, ¡atención!, fala en castellán- del cuentu en versu robláu por Paquito Candil, alcuñu d'Eloy Fernández Caravera.
El romance que güei presento ('Navaya', cuento de actualidad') asoleyólu LA VOZ DE AVILÉS el xueves 13 de payares de 1913, dientro d'un separtáu xenéricu de Caravera entituláu 'Al son de la gaita'. Dividíu en cuatro partes, moraliza socarronamente alredor del peligru de nun midir les bromes onomástiques y del de cumplir les promeses, y compúsolu Caravera nel marcu d'unes eleiciones locales n'Avilés:
I
Don Pancho Fernández Pérez,
a quian tós llamen 'Navaya',
y'un habanero más vieyo
que la fonte de la Xana.
Ye baxiquín d'estatura,
delgadín com'una paya
con güeyos com'aceitunes
y arrugadín de la cara.
Anda lluciendo 'chaquet'
de nidia y brillante alpaca;
calzones de 'casimir'
de los que fizo na Bana
y que tienen tanto güelo
que someyen una saya;
calcia ferrades madreñes
y lleva gran jipijapa.
Y asina, d'esta fegura,
co'el calor u con xelada
anda siempre por Caxiello
desque veno pa so casa.
(Y pasanon ya diez años;
non se creya que fue nada).
II
Ye la xente de Caxiello
folixera y folganzana,
amiga siempre de rise,
xente de tambor y gaita,
capaz de facer diablures
al llucero que n'el alba
com'un puntiquín d'oro
puesto po la mano santa
da siempre los buenos díes
al que sal ceu de la cama.
Y asina con tales xentes,
¿non diba ser muy notada
la presencia de don Pancho
por so fegurina rara?
¿Non diben llamalo nombres?...
¡Pos llamáronlo 'Navaya'!
Pero non cuntaba naide
qu'aquel homín de tal facha
tenía xenio, ¡qué xenio!
y que yera todo rabia
y que probe del que, cerca,
s'atreviera a deci i nada
de so fegura, ruindá,
andares, años u facha;
porque pegaba i tres tiros
en menos q'un gallo canta.
Los mozos (pero de lexos
y guardando bien la cara)
de vez en cuando llamábenlo
a grandes voces: «¡Navaya!».
Y don Pancho, medio lloco,
diba tras d'ellos con rabia,
con un revólver na mano...
¡Ay, probe del que pillara!
III
Ante'l cura de Caxiello,
viendo q'a naide pescaba,
un día xuró don Pancho
esto q'aquí se relata:
-Al primero que me nombre
con el mote de 'Navaya'
le juro, padre, por éstas
que si le cojo, las balas
de mi revólver van todas
a la sien del que me llama
tal nombre; yo no permito
de mí ni pullas ni guasas;
y repito que le juro
que quien las hace, las paga.
Y soy un hombre muy serio
y sé cumplir mi palabra.
IV
Era día d'elecciones
pa concejales. 'Navaya',
prisidente de la mesa,
complía so misión santa
cudiando de la sopera
qu'en vez de sopa guardaba
les blanques candidatures
con que la xente votara.
El día pasó tranquilo,
les elecciones con calma
y, asina, dieron les cuatro,
hora que la Ley señala
pa facer el escrutinio
pa ver quián pierde, quián gana.
Entamó'l probe don Pancho
a leyer con voz cascada
los nombres qu'en los papeles
aparecíen. Sacaba
uno solo, desdoblábalo
y leyía con voz alta:
«Don Perengano de tal»,
y, lluego que lo nombraba,
sacaba más papeletes
y en todes lía con calma
los nombres de candidatos
sin metese con más nada.
Pero la xente ye'l diaño
y en facer mal non repara.
Cuando ya diba don Pancho
liyendo sin miga falta
tantos nombres com'había,
con la vista ya cansada,
con ganes ya d'acabar
pa dir estirar la pata...
un papel que paña diz:
«Don Pancho Pérez, Navaya».
Y don Pancho, sin fijase,
dixo'l nombre con voz alta
y, después que dióse cuenta
de qu'él mesmo se 'llamara',
acordóse q'ante'l cura
un día pasáu xurara
matar a quian i dixera
aquel mote de 'Navaya'...
y, compliendo'l xuramento,
llevó'l revólver a la cara
y disparó cinco tiros
que i furaron la vidaya
y cayó muerto, redondo,
¡por ser home de palabra!
