ESTHER GARCÍA ESCRITORA POETES ASTURIANOS D'ENTESIEGLOS (XIX-XX) FABRICIO (II)
La autora tan nun de los sos meyores momentos tras ganar el Premiu Uviéu y el Xosé Álvarez
16.12.08 -
Esther García, con algunos de sus libros, ayer en Avilés. / MARIETA
La escritora valdesana, Esther García, ta nun de los sos meyores momentos como creadora. Nestos últimos meses les publicaciones y premios tanto en poesía como en narrativa, lleguen ensin parar. Acaba d'asoleyar un poemariu, 'Pisadas', ganador del Premiu Uviéu y un relatu cortu, 'La maestra', ganador del premiu 'Xosé Álvarez' del Centru Asturianu de Madrí.
-¿Qué podemos atopar en 'Pisadas'?
-Ye un poemariu mui personal, intimista. Versos qu'espeyen sentimientos y vivencies, versos esparcíos pel camín del tiempu. El camín recorríu con toles cargues al llombu. Versos que cantan al amor, presente a lo llargo de tol poemariu, amor carnal, amor a lo vivío y amor vivu. Tamién apaecen otros temes yá trataos n'obres anteriores: l'alcordanza de la infancia, la nueche, la lluz, el mar, la calle, la Naturaleza...
-¿Por qué escoyó esti títulu?
-Pa mi ye un títulu redondu. Teniendo en cuenta les distintes aceiciones de la palabra «pisada», el títulu cuadra perbien nestos versos: "Pisadas", palabra aquí utilizada como imaxe que fai referencia a los pasos, les pisaes coles que recorremos «el camín». Un camín pol que vamos pisando en firme, o en falsu... Pisaes silencioses, ruidoses, resbaladices. Ya dalgún qu'otru pisotón que nos da la vida. Pero tamién s'alcuentren las «pisadas» nel llibru con otres aceiciones. Les pisaes que dexen seña nel corazón, les pisaes del amor, toles pisaes que vamos dexando tres de nós... Y el ruíu que se fai al pisar: «Sinto los tous pasos, las pisadas...; síntote nel aire... sinto l'ecu de pisadas».
-¿Qué tal tan siendo les crítiques?
-Toles opiniones que me llegaron fueron toes buenes y positives. Ye un poemariu que gusta muncho y lliterariamente, tuvo mui bona crítica y mui bona acoyida. D'otra miente, ye una edición mui cuidada, un diseñu mui guapu que paez ser que ta acordies col conteníu. Siéntome satisfecha.
-Nestos últimos meses tien espublizao munchu material, dende un llibru d'haikus a esti poemariu, pasando pol cuentu ganador del certame del Centru Asturianu ¿Ta na so época más creativa?
-Nun puedo negar qu'estos tiempos fueron de perbona collecha lliteraria y de bon frutu. Bona reconocencia con estos premios ganaos. Paezme que toi viviendo un momentu brillante no que cinca a les lletres. Nestos díes va salir un llibru pa infantil, qu'edita Pintar y Pintar y allá pa febreru, otru más, tamién pa neños, que ta agora nel fornu. Los títulos dexarémoslos pa cuando salgan, porque sinón vamos confundir al llector.
-¿En qué momentu está?
-Siéntome con ganes d'escribir y de crear y prestaríame poder entregame dafechu a esta xera de la lliteratura que ye lo que me gusta. Nun tengo tol tiempu que quixera tener pa escribir. Hai veces que me prestaría que'l tiempu se detuviera. Y arriendes de la lliteratura van xuntándose otros llabores y compromisos que surxen d'ello. Amás del tiempu dedicáu a la mio profesión, amestao a tolo que conlleva ser muyer, (ama de casa y too eso...). Yo deséome a mi mesma qu'esto seya l'aniciu d'un camín enllenu de «pisaes lliteraries». Espero poder siguir polo menos na llinia d'estos últimos años. Toi enfotada nello.
-'La maestra' ye una narración que nos lleva hasta los años 50 del sieglu pasáu y que cunta la llegada d'una maestra a una población rural. ¿Por qué escoyó esta historia?
-Yo soi maestra, munchos años dedicada a la profesión, profesión que forma parte de la mio vida. Y amás tola mio escolaridá trescurrió nuna escuela rural. Por otru llau, estos años, pola mor del tema qu'escoyí pa la tesis doctoral, rellacionáu cola educación n'Asturies, manexé munchos documentos antiguos y púnxime al corriente sobre les condiciones de les escueles naquella dómina. Ye fácil que los temes sobre los que se t'ocurre escribir tengan influencia de les tos vivencies, anque'l rellatu nun ye pa nada autobiográficu. Pero ye un rellatu al que-y tengo un aquel especial, paezme que la Señorita Lena, protagonista de la historia, bien pudo ser una maestra de la época. Y toi muncho más contenta porque foi premiáu y entós reconocíu'l so valir lliterariu. Ye un homenaxe a aquelles maestres rurales que pasaron tantes calamidaes exerciendo polos pueblos de la nuesa xeografía.
-La situación de la enseñanza, por suerte, cambió abondo dende la época que nos narra esti cuentu...
-Bueno, nun hai color. Voi referime a la escuela rural porque ye la que s'espeya nel rellatu. Los pueblos güei cambiaron muncho. Namás se diferencian de la ciudá porque allí'l tiempu dura más y el silenciu y la paz que se respira ye dalgo que tovía nos eleva l'espíritu. Por suerte, llegaron a les aldees tolos avances teunolóxicos, pero tristemente, los neños, los pocos neños qu'hai nos pueblos d'Asturies, vanse n'autobús a la escuela de la ciudá o a la de la villa. Esto va desenraigonándolos del llar. Y, mentanto, les escueles de los pueblos morrieron de tristura. La mayoría tán caíes y enllenes d'artos y de maleza. Los maestros yá nun tienen que tar de posada nos pueblos. Cola motorización llegó la llibertá. Los neños son distintos, agora manden ellos na escuela y en casa. Anque los de los pueblos, inda se paecen un poco más a los d'hai cincuenta años.
