VA nueve años, llevóme'l destín a participar nes últimes negociaciones pa reformar el nuestru Estatutu d'Autonomía, aquelles que tuvieron por escenariu Cuadonga, un llugar herederu d'un mitu según l'últimu hexéxeta de la nación gallega, en comparanza cola tiez qu'él-y atribui al reinu suevu. D'ellí salió la redacción actual del Estatutu, que namás camudó de l'anterior pa marutar un poquiñín la llaceria d'un textu que nos tien a los asturianos ensin reconocimientu identitariu nin instituciones polítiques realmente autónomes nin drechos llingüísticos nin capacidá financiera, etcétera. Les dos coses que daquella más me llamaron l'atención, perriba del caleyar concretu de les conversaciones, qu'otru día igual vien a cuentu narrar, fueron la dependencia foriata y la falta d'idees de los negociadores del PSOE y del PP.

Dependencia, porque teníen que llamar pel móvil pa pidir autorización y zarrar cualquier alcuerdu, ¿hasta pa consultar una nueva propuesta qu'ellos mesmos echaben enriba la mesa!, y falta d'idees porque nun teníen un diseñu de l'Asturies que queríen pa los ciudadanos a los que representaben, y de la que l'Estatutu tien que ser el so contratu social, sinón que taben ellí pa ver que'l contrincante políticu nun sacase tayada d'aquella situación. Cada vegada que se pronunciaba una frase nueva, o que dalguién abría una puerte al consensu, mesmo los socialistes que los populares desenfundaben los teléfonos pa llamar a Isidro Fernández Rozada, entós presidente del PP asturianu, o al inefable Francisco Álvarez-Cascos, o al mandamás Villa, los socialistes que yeren de la so triba, o a Joaquín Almunia, daquella interinu secretariu xeneral del PSOE. Ye difícil explicar les cares que-yos quedaben cuando la grabación anunciaba que, au fuere, el teléfonu taba apagáu. Cada vegada que se proponíen nuevos instrumentos pa meyorar el futuru de los asturianos, o se facía comparanza de los instrumentos institucionales, llegales y competenciales de que gozaben n'otros territorios, por cierto, siempre más ricos y prósperos qu'Asturies, mesmo los socialistes que los populares facíen: «¿Pa qué lo queremos?». Les coses nun tienen caminao nin un pasu d'entós p'acá.

Sobre la dependencia de populares y socialistes de la so obediencia a Madrid nun fai falta dicir gran cosa. El PSOE quier agora acompangar lo que salga del enguedeyu catalán poniéndonos delantre los güeyos una reforma que dea apariencia de normalidá a les modificaciones estatutaries. Pero bien sabemos qu'esti procesu entamó porque facíen falta los votos pa investir a Zapatero, y non porque la FSA crea que a los asturianos nos fai falta un Estatutu meyor. El PP, con tal de da-y al contrincante en focicu, dixo primero qu'Asturies tenía quedar al mesmu altor que Catalunya; depués, que nun yera ésti asuntu p'andar con priesa y, agora, que val más nun facer nada. Consignes coles que se fue contradiciendo Ovidio Sánchez mientres sentía falar a Rajoy nos telediarios.

Sobre la falta d'idees, los populares nun tienen ninguna, a lo menos hasta qu'abocane dafechu l'alderique del 'Estatut', pero los socialistes, y tamién IU, la tercer pata del tayuelu parlamentariu, yá nos tán allumando. Javier Fernández, secretariu de la FSA, tien afirmao estos díes qu'a la identidá asturiana nun-y fai falta la reforma estatutaria y que la cooficialidá del asturiano nun ye posible, porque nun quieren imponer la llingua a naide. Dos idees-fuerza: qu'ellos namás nagüen por tener delles competencies más, escaeciendo los incumplimientos de la lletra actual del Estatutu, y que los que piden drechos llingüísticos quieren obligar a los demás a falar asturiano. Esta cabera idea van repetila hasta apolmonar a los ciudadanos y, de xuru, a ella va apuntase'l PP. Laura González, conseyera de Vivienda del Gobiernu, tien dicho que la llingua asturiana nun va ser un pilancu na negociación estatutaria. Otra idea-fuerza: la presencia d'IU nel Gobiernu asturianu ye, pa esa coalición, muncho más importante que la reforma estatutaria, que los drechos llingüísticos de los asturianos y que los sos compromisos electorales, como yá demostró ella cuando, siendo presidenta de la Xunta Xeneral, prohibió a Xuan Xosé Sánchez Vicente usar l'asturiano nel Parlamentu. Ello ye, si nun conciden col PSOE, que nun conciden, entós ye meyor nun tener priesa y dexar esti asuntu pa prau.

Al cabu: si la FSA namás quier encuriosar l'Estatutu pa sumar delles competencies que nos convienen, o-y convienen, y cuenta que la cooficialidá del asturiano ye 'obligar' a la xente a falalo; y si IU pon delantre del alcuerdu estatutariu la bayura que pa ellos ye tar nel Gobiernu, ¿qué va ser de la reforma? Les idees de don Javier y de doña Laura dirán espoxigando nos meses por venir y a elles va sumase un Ovidio Sánchez cada vegada menos alternativa de poder.