ACABA de publicase un trabayu del periodista Xuan Cándano, un magníficu llibru de redacción entretenida, didáctica y documentada, que narra los sucesos de la Guerra Civil n'Euskadi y, fundamentalmente, la rendición del nacionalismu vascu a les tropes italianes del bandu 'nacional' nel llamáu 'Pacto de Santoña', un fechu esti de capital importancia pal resultáu final de la guerra, pa la muerte de la Segunda República española y pa la suerte d'Asturies naquel intre históricu. Munchos llectores camentarán de xuro que será otru llibru más qu'afonda, nun sen o n'otru, nel revisionismu históricu que, d'un años p'acó, se vien faciendo de la Guerra Civil, pero non. Xuan Cándano nun desdiz lo que fundamentalmente se conocía hasta güei, pero afonda na verdá d'aquellos díes, y asoleya pal gran públicu lo que siempre tuvo tapecío ente una nublina que convenía a toles partes. Como esclaria dende les primeres páxines, y tamién fai Gregorio Morán nun prólogu de fondu sentir antinacionalista, el nacionalismu vascu arrequexó esti episodiu de la so historia porque foi una traición a la República española y porque, depués de la llarga dictadura, y hasta güei, vistióse col traxe del antifranquismu y nun-y convenía que se supiera la verdá; la izquierda española, heredera del legáu republicanu, porque yera la parte traicionada, y el mesmu réximen de Franco, porque suponía reconocer la intervención de tropes extranxeres na mesma guerra y un pactu, anque depués nun se cumpliera, con uno de los degorrios (el separatismu) que xustificaben la sangre que facíen correr per España.

El 'Pacto de Santoña' foi'l cumal de l'ambigüedá del nacionalismu vascu dende l'aniciu de la Guerra Civil, dividíu ente les semeyances ideolóxiques col 'movimientu' llevantáu n'armes, especialmente no que se refier a la relixón católica, y la simpatía por una república que podía concede-yos parte de les sos reivindicaciones tradicionales, como asina fizo col Estatutu d'Autonomía y la entrada del PNV nel Gobiernu republicanu. Hasta qu'estes dos últimes circunstancies nun foron una realidá, los 'gudaris' vascos nun se presentaron nel frente de batalla pa defender la so tierra del avance franquista. Coles mesmes, en pasando les tropes nacionales d'un Bilbao que quedó enteru y ensin estroza nenguna, los 'gudaris' vascos buscaron una rendición coles meyores condiciones y enxamás pensaron siguir defendiendo a una República que nun yera la d'ellos, por española y revolucionaria.

Yo tenía un güelu que tuvo lluchando nel mesmu bandu que los 'gudaris' vascos, al par d'ellos nel ciercu, qu'escapó de Bilbao peles trincheres del tren depués de tener que dir a buscar a un batallón que quedara tresmanáu en medio de la engarrada, y que volvió andando hasta casa depués de que quedara colo puesto cuando'l barberu de la compañía, que-y guardaba les poques coses que supongo se pueden tener nuna guerra, morriera d'un tiru atináu d'un francotirador. Esi güelu siempre falaba de la «traición vasca», pero al tiempu siempre emponderaba la «coherencia» de los 'gudaris' al defender la so patria, l'uniforme de pantalones de mahón siempre llimpios (que contrastaba colo malafechiscos que diben los milicianos republicanos), la comunión diaria que practicaben en campaña anque cayeren les bombes a dos pasos y la humanidá que practicaben, torgando les vengances, en medio d'una guerra como aquella.

Mio güelu yá nun tien tiempu pa lleer a Xuan Cándano, pero diba quedar plasmáu al comprobar cómo la única coherencia del nacionalismu vascu yera, y ye, la defensa d'una patria qu'interpreta siempre, y n'esclusiva, el PNV. Daquella, como anguaño, toles decisiones del primerizu Gobiernu vascu veníen fiscalizaes pol partíu, porque'l partíu ye la patria, y la patria taba perriba de tolo demás, incluyía la democracia. Por eso, al cabu, prefirieron rendise al fascismu.

Esa 'coherencia' («la única virtú de la política») del nacionalismu vascu que retrata Xuan Cándano en 'El Pacto de Santoña' esplica de xuru munches coses sobre la traxedia d'Euskadi nestos caberos 40 años, sobre la transición a la democracia n'España, y sobre'l fenómenu etarra que vien condicionando tola política española dende la muerte de Franco. Agora conozse que'l PNV encara la nueva situación del 'altu'l fueu permanente' separtáu ente'l soberanismu de Joseba Egibar, que namás quier pactos ente los nacionalistes, l'esmolecimientu electoral del lendakari Ibarretxe, que tarrez presentase a unes elecciones ensin 'plan', y l'enfotu de Josu Jon Imaz en que nun se puede dexar pasar esta oportunidá. La 'coherencia' del PNV al escoyer siempre la patria a la democracia abultó resuelta cola Constitución del 78, pero mientres les sigles d'ETA sigan vives a munchos ruxiranos la dulda. Igual el mayor aciertu de Zapatero vaya ser tener hasta agora orielláu al PNV de tol 'procesu de paz', nun vaiga ser que la so 'coherencia' lu faiga descarrilar.