Ye mui prestoso presentar, otru añu más, la Selmana de les Lletres Asturianes, una celebración onde se fai homenaxe a les nuestres lletres: a los escritores, a les sos creaciones artístiques, a los llectores y al públicu. Y, cómo non, ye un homenaxe a la ferramienta comunicativa que fai posible esa lliteratura: la llingua asturiana, y na zona más occidental d’Asturies, el gallego-asturianu. Mándo-yos el primer saludu desde equí a tolos que-y dan a la nuestra lliteratura esi prestixu y esi respetu que tol mundu reconoz.

L’añu pasáu aportóse un elementu nuevu a la Selmana de les Lletres Asturianes. Pela primer vez, nun se-y dedicaba a un escritor concretu, sinón que s’escoyó una celebración temática, y fízose-y un homenaxe a la poesía contemporánea. L’ésitu d’esta nueva opción demostró qu’esi camín ye tamién correctu, y la fórmula treslladámosla tamién a esti añu, dedicándo-y la Vixesimusétima Selmana de les Lletres Asturianes a otru xéneru fundamental, como ye’l teatru.

El lema ye bien xustu: «Cuatro sieglos nel actu», pues n’efectu, yá el primer escritor conocíu n’asturianu, Antón de Marirreguera, yera poeta y autor de diálogos teatrales del sieglu XVII. El teatru siempre fue ún de los xéneros representativos de la nuestra lliteratura. N’otres dómines, el teatru yera l’espectáculu por escelencia, y lo mesmo n’Asturies que n’América, l’estrenu de les obres n’asturianu yera un acontecimientu social. Na actualidá, el teatru nun ye’l xéneru más profusamente cultiváu, pero sí ye’l que mayor favor popular conserva. El so mantenimientu ye frutu del trabayu esforzáu d’autores, compañíes, actores, programadores, y tantes persones que cola so devoción a esti xéneru faen posible’l milagru de la escena. Ye la nuestra obligación dar a valir esta muestra de fidelidá al xéneru dramáticu espresáu n’asturianu y en la fala occidental.

Pa ello, iguóse un programa que quier ser la gran folixa del teatru. A lo llargo de seis díes, tán programaes 23 representaciones escéniques repartíes per otros tantos conceyos d’Asturies, movilizando a toles compañíes qu’utilicen la llingua, y pensando en toa mena d’estilos y públicos, desde’l xéneru popular y tradicional, hasta’l teatru asturianu contemporáneu, español y estranxeru. Hai tamién presentaciones de llibros y DVD’s, recitales poéticos, llectures públiques, xornaes y conferencies y otros actos institucionales. En xunto, un total d’unos 40 actos, nuna Selmana de les Lletres participativa, que da xuegu a toles zones d’Asturies, y plural nes estétiques y nos públicos.

Xentes del teatru: sabéi qu’apreciamos la importancia del vuestru trabayu, y por eso, tresmítímosvos el nuestru apreciu pol vuestru llabor.

Promover los fechos culturales espresaos na llingua autóctona, ye una de les nuestres funciones primordiales y ye una parte más de la nuestra política lingüística. N´esti sen, aprobóse como ye de toos conocido, nel mes de xunu del añu pasáu na Xunta Xeneral del Principáu el Plan de Normalización Social del Asturianu 2005-2007, cola unanimidá de toles fuerces polítiques.

Esti Plan supón una ferramienta positiva pa la llingua dexando de forma nidia les línees de política llingüística que tan marcando el presente y van marcar el futuru.

Dende que entamara la lexislatura, nel 2003, en materia de política llingüística tamos oxetivamente nuna meyor situación qu’enantes. El nuestru enfotu ye avanzar en sintonía cola realidá política y social asturiana, y tamos faciéndolo, xuntando inquietudes y desendolcando un auténticu Plan de Normalización Llingüísitica que contó, repito, col apoyo de toles fuerces polítiques asturianes.

Nesti trabayu nun quiero dexar d’emponderar la dedicación y el trabayu enorme que desarrolla l’equipu de persones qu’integren la Oficina de Política Llingüística del Principáu, dientro la Dirección Xeneral de Promoción Cultural y Política Llingüística; son munchos los llogros actuales en materia llingüística los que se deben a la so dedicación.

El Plan de Normalización sigue desarrollándose, con dellos puntos clave que destaquen penriba les demás. No que toca al aspectu económicu, la Oficina de Política Llingüística entamaba la lexislatura con un presupuestu de 1.250.000 euros nel 2003, y agora nel 2006 asígnense-y 2.060.000 euros; ye decir, un aumentu del 65 %. Y si la referencia ye el propiu Plan de Normalización, éste dedica a la política llingüística del Principáu 8.500.000 euros al añu, involucrando a diversos organismos.

En materia toponímica avanzóse sustancialmente. La Xunta Asesora de Toponimia entamó a funcionar en mayu del 2004. Pasaos dos años, tán cumpliéndose los oxetivos en materia de recuperación y oficialización de topónimos tradicionales d’Asturies. Los datos rescamplen: 10 conceyos d’Asturies colos topónimos tradicionales oficiales por Decretos del Conseyu de Gobiernu; 7 nuevos Decretos que van dir aprobándose en feches mui próximes; y otros 29 conceyos onde la Xunta de Toponimia ta trabayando en comuña colos Ayuntamientos. En conxuntu, son yá 46 conceyos los que tán comprometíos nesti procesu: más de la metá d’Asturies. Un procesu que ta llevándose a cabu cola participación abierta de los Ayuntamientos, asociaciones representatives y vecinos. El llabor tan meritoriu que tán faciendo los miembros de la Xunta de Toponimia merez el nuestru reconocimientu públicu. Pero’l procesu de recuperación toponímica sigue en marcha y acompañao por otres iniciatives, como Campañes Informatives de Toponimia y la publicación d’un Anuariu que va recoyer l’actividá nestos dos años.

D’acuerdu tamién col mandáu del Plan de Normalización, la Conseyería de Cultura tien un compromisu col fomentu de la política llingüística municipal. Aumentaron por demás les ayudes a los proyectos de normalización socio-llingüística entamaos desde los Conceyos. La lexislatura empezó con una dotación de 150.000 euros pa los conceyos, pasóse nel 2005 a 313.000 euros, ye dicir, un aumentu del 109 %. Son 44 los conceyos que l’añu pasáu se beneficiaron d’estes ayudes con 140 proyectos.

Per otru llau, foméntase nos Ayuntamientos la creación y continuidá d’oficines o servicios de normalización llingüística propios. Nesti momentu esisten 10 servicios en toa Asturies, qu’atienden a 16 conceyos d’Asturies en total, lo qu’equival a un volume de población de 600.000 habitantes, el 60 % de la población del Principáu. Estos servicios dependen del esfuerzu mancomunáu de los Ayuntamientos y de la Conseyería de Cultura.

Trátase, como toos conocen, d´un Plan ambiciosu que ye un pasu fundamental e inéditu nel compromiso col asturianu y el gallego-asturiano, nel que está trabajando el conxunto del Gobiernu, dende distintos ámbitos. N´esti sen nun pueo dexar de señalar la llabor fecha dende la Conseyería d’Educación y Ciencia, que también participa nesta Selmana de les Lletres nel só ámbito: el educativu.

Tampoco podemos escaecer otres actuaciones fundamentales que, por tar tan asentaes un añu tres d’otru, cuérrese’l peligru de perdeles de vista. Por exemplu, vamos recordar que’l nuestru programa d’ayudes a la edición de llibros n’asturianu y gallego-asturianu tien tanta importancia, que la gran parte de l’actividá editorial nesti campu débese a les nuestres ayudes. Nel 2004, publicáronse 133 llibros en llingua autóctona. Les nuestres subvenciones al usu de la llingua nos medios de comunicación (periódicos, revistes, radio, televisión) faen posible la continuidá d’espacios y medios diversos que s’espresen n’asturianu. Gran cantidá d’asociaciones culturales y de defensa de la llingua asturiana vense beneficiaos tolos años pola nuestra concesión d’ayudes a diferentes proyectos de normalización llingüística. Y siguimos calteniendo el nuestru programa d’ayudes a les empreses que presenten proyectos interesantes de normalización llingüística nel so ámbitu d’actividá.

El apoyo y reconocencia de la realidá de “la fala” ye evidenciau nel tratamiento que tien recoyíu nel Plan de Normalización. Ésti mesmu tien una redacción tal que se refier siempre en paralelo al asturiano y al gallego-asturiano, y publicóse trilingüe, en castellano, asturiano y gallego-asturiano. Nesti momentu, hay cinco conceyos del Eo-Navia trabayando en la recuperación toponímica: El Franco (que ya tien la so toponimia oficializada), Grandas de Salime, Pesoz, Vegadeo y Tapia. Agora nesti mes de mayo vamos facer, xunto col Conceyo del Franco, les “Xornadas de Toponimia del Eo-Navia”, baxo el título «Os nomes dos nosos sitos».

Nesta ocasión en que facemos un homenaxe al teatro asturiano, nun quiero dexar de manda-y la mi enhorabuena a un de los más grandes autores del teatro popular n´asturiano: el veterano escritor Manuel García “Galano. Nós queremos facer un reconocimiento a “Galano”, al home y a la obra, porque ye la expresión más auténtica del apego a la tierra, a la xente y a la fala. Así diz un personaxe d´un de sus famosos «parzamiques», que retorna de América:

«Peró condo al outro día pola mañanía cedo se chegóu debaxo del castañeiro y miróu y remiróu el paisaxe que s’outiaba desde alí, aquela pequena aldea, el sou pueblo, parecéuye el sito máis guapo del mundo».

Paeznos, con “Galano”, qu’Asturies ye de verdá un sitiu “mui guapu”. Col trabayu de toos, vamos facer que lo sea tovía más

Munches gracies y, si me lo permiten,: “Arriba el telón”.