Una selmana de nueve díes (por mor de la ponte festiva del Primeru de Mayu, que paraliza la vida pública) y más d'una trentena d'actos culturales de toa mena pa conocer y reconocer el llabor de dramaturgos, actores, actrices y directores. La XXVII Selmana de les Lletres Asturianes llevanta güei'l telón col teatru n'asturianu como dueñu de la escena. Representaciones teatrales, unes xornaes universitaries d'estudiu alrodiu d'esti xéneru lliterariu y escénicu, una llectura de testos a cargu de diputaes y diputaos de la Xunta Xeneral del Principáu y la presentación de llibros y vídeos dan cuerpu al programa qu'entama la Conseyería de Cultura, Comunicación Social y Turismu del Principáu cola collaboración de numberoses instituciones y entidaes d'Asturies y Catalunya.

Los dos primeros actos de la Selmana tuvieron llugar el pasáu vienres, cola presentación n'Uviéu, a mediudía, del llibru 'En tables. Un teatru pal sieglu XXI', nel que l'escritor y historiador Dolfo Camilo Díaz recuerre con güeyos críticos la situación y les espectatives del teatru n'asturianu. Pela tarde, la Capiella de los Dolores, en Grao, foi l'escenariu del estrenu del espectáculu poético-escénicu 'Veus paral.leles-Voces paraleles', nel que participaron cuatro autores en llingua catalana y cuatro n'asturianu.

Como ye vezu, nel marcu de la Selmana de les Lletres va celebrase, el vienres, el Día del Llibru y del Discu n'Asturianu, al que se sumen llibreríes y tiendes de discos de tola comunidá autónoma, que pa esa xornada rebaxen nun diez por cientu'l preciu de les obres en llingua asturiana.

El vienres, otra cita clásica ye la manifestación pola oficialidá qu'entama peles cais d'Uviéu la Xunta pola Defensa de la Llingua Asturiana, qu'esixe un cambiu d'estatus del idioma autóctonu na prevista reforma del Estatutu d'Autonomía. Darréu, l'Academia de la Llingua celebra'l Día de les Lletres Asturianes con un actu nel teatru Filarmónica, onde va ser acoyíu como académicu d'honor Manuel García 'Galano', un octoxenariu escritor de gallego-asturianu.