Los abaxo firmantes, profesores de ESO de Llingua asturiana del conceyu Xixón, queremos manifestar el nuestru reconocimientu pal llabor de la Oficina Municipal de la Llingua, en xeneral, y, n'especial, pa colos nuestros alumnos.

Teniendo en cuenta la situación en xeneral, de la llingua asturiana y más en concreto, la situación de l'asignatura dientro del sistema educativu, nel que:

Tovía esisten centros nos que se ponen estorbos a la cenciella posibilidá de que l'asignatura s'imparta.

La ufierta ye inesistente na enseñanza privada, concertada o non, a nun ser honroses esceiciones como'l colexu San Lorenzu.

Ye la única materia d'ufierta obligada que nun ta reconocida como especialidá, condergando a los profesores a la interinidá eterna, a facer oposiciones por otra materia, al permanente baille de nun repetir destín.

A ser el coleutivu, a nun ser contaes esceiciones, del mediu horariu o del horariu compartíu. A ser munches veces ninguneaos nos centros polos motivos enantes dichos. A que de resultes de too ello a l'asignatura y la llingua y cultura asturianes en xeneral, se la vea como un perda de tiempu y nun pueda salir d'un círculu viciosu de desprestixu que la empoza más entá.

Teniendo en cuenta too esto, dicimos, ye altamente gratificante pa los nuestros alumnos y pa la llingua y cultura asturiana qu'haya a lo menos un organismu como la Oficina Municipal de la Llingua de Xixón, qu'apoye'l llabor que día a día se fae nos centros y qu'amuese a los estudiantes que nun solo tienen drechu a facer lo que faen, conocer la llingua los sos antepasaos y la cultura de la tierra na que viven, sinón qu'amás tienen de tar arguyosos de facelo.

Por too ello: gracies, Oficina Municipal de la Llingua, gracies por enseñanos a toos, mayestros y alumnos, a sacar la llingua a la cai y a la vida.