YE común, en munches crítiques cinematográfiques, lleer que l'argumentu de la cinta ye previsible, que nada pasa na historia que nun fuéramos quien a acolumbrar de lloñe, y dizse siempre como deméritu, claro. Sicasí, al séptimu arte, si algama esta categoría dacuando, nun-y tendría qu'importar gota que los acontecimientos se vieren vinir, porque tendría que llevantase perriba de la continxencia de 'lo que pasa', pa expresar sentimientos y emociones muncho más con 'cómo pasa'. En política pasa davezu lo mesmo: los acontecimientos vienen a escontranos y vémoslos venir, cuanto más que se nos arrimen más claros se nos pinten delantre los güeyos. Namás los que tán ciegos pola bandería que los acolliña se nieguen testerones a ver lo que va pasar. Pero la política tamién nagua dacuando por ser arte, asina que, anque sepamos lo que va pasar, puede que, si los actores que representen la obra tienen cuayu, seyan a enseñanos una pequeña obra maestra. Nun ye'l casu, en xeneral, de la política asturiana, onde a los acontecimientos que dependen de la voluntá de la clase dominante véselos aportar con meses d'antelación, y véselos llegar malafechiscos, probes, esfarxoletaos, ensin gracia.

Agora anuncien, mesmo la FSA per boca de Fernando Lastra, l'aprendiz de Pepe Blanco asturianu, qu'IU, en palabres de dellos voceros, que'l pactu de gobiernu ta a piques d'esmucise pel sumideru a poco qu'ún d'ellos meta la pata. Y ello a cuenta de la escoyeta de María Antonia Fernández Felgueroso (PSOE) y Noel Zapico (PP) como titular y adxuntu de la nueva figura de Procurador Xeneral. Que la comedia del 'gobiernu plural de la izquierda', ello ye, la tensión de dos fuerces desemeyaes que trabayen duro tolos díes pa 'dialogar' y ponese d'alcuerdu en 'puntos comunes', diba dir 'in crescendo' según nos allegásemos a la fin de la llexislatura sabíalo cualquiera; qu'a los dos socios-yos convién encarar les eleciones autonómiques del añu qu'entra como eses pareyes que se separen unos meses pa encuriosar la so cafiante relación conozse de siempre, y que la engarradiella nun diba ser por un asuntu que-yos trancase la puerta a siguir n'andecha depués d'un resultáu electoral amañosu tamién taba nel guión. Pero que se truñan por los dos cargos del Procurador, eso sí que tien cantu, eso sí que ye poco artístico, eso sí que ye una película previsible de les que dan ganes de dexar de ver.

Los argumentos del PSOE, diciendo qu'ellos nun aconceyaron con naide, que namás apurrieron una propuesta y, ¿oh, dioses!, la so iniciativa llogró la mayoría parlamentaria por esconxuru, ye ún de les explicaciones más zorramples que se tengan sentío na política asturiana. Y l'argumentu d'IU, al traviés del conseyeru Valledor, de qu'ellos persiguíen una 'rexeneración democrática', y por eso queríen metese dientro de la pota onde se cocieron los nomes de los escoyíos, namás lu atiende, a esti altor de la 'película', el carboneru con fe. La cosa ye que'l PSOE pactó col PP porque piensa que-y convién pa caltener el poder depués de les prósimes elecciones, y igual pa ver si allega a Ovidio Sánchez a una reforma estatutaria de partu cortu, con dos obxetivos: pa siguir 'c' por 'b' los dictaos de Zapatero y ayudar, reformando'l nuestru Estatutu, a la estratexa xeneral del Estáu, y pa tarazar lo más lluego que pueda la creciente opinión favorable a una reforma seria (como son toles que se ficieron o tán cuayando yá: Andalucía, Valencia, Baleares ) que nun nos dexe albentestate del nuevu mapa que ta pintando l'Estatut catalán. Una reforma, entós, que tendría qu'incluyir la referencia a Asturies como 'nacionalidá' de les del artículu segundu de la Constitución, y la oficialidá de la llingua asturiana. La cosa ye qu'IU ta entornada porque quedó ensin puestu na institución del Procurador, ello ye, quedó fuera de la partición, y eso nun ye un bon xestu viniendo d'un sociu de gobiernu. Lo de la rexeneración democrática ye una chifla porque, corrupciones a un llau, poco o nada hai que llimpiar nun sistema democráticu que nun llimpien los ciudadanos cuando les elecciones.

Agora, vamos facer como'l cuciu y avezáu espectador de cine al que yá-y 'suena' la película, el previsible telefilme del pactu PSOE-IU y el so final. Los acontecimientos pueden dir, más o menos, asina: pal añu que queda de llexislatura caún de los socios votará dacuando desemeyao nel Parlamentu, 'venderán' dixebraos los llogros del gobiernu y puede qu'hasta IU marche a última hora del gobiernu, si se ve muy apurada o según pinten les encuestes. La única posibilidá entós de que'l réxime asturianu nun se convierta nun réxime de partíu únicu, vista la incapacidá del PP pa ponese al día, ye que l'asturianismu entre na Xunta Xeneral pa da-y contraste a esta comedia tan previsible y con tan pocu arte.