LA muerte d'Igor Medio y de Carlos Redondo atacóme per internet en Catalunya, a unes decenes de kilómetros d'onde ellos diben tocar, axuntaos a otros collacios nel grupu 'Felpeyu'. Ye lo que tien la rede, que nun te dexa escapar de les desgracies por muncha ralura que pongas ente ti y les coses que quieres. Eses muertes inxustes, por antemanaes y repentines, asoleyaron a la lluz dos vides que son exemplu de les d'otros munchos asturianos arrequexaos na so propia tierra. Yo nun conocí a esos dos ciudadanos, asina que nun cuento face-yos panexíricu nengún, porque namás disfrute de les sos obres como otros tantos lo ficieron estos últimos años; pero sí creo saber del trabayu, la dedicación y la soledá que nesta tierra faen falta arrecostinar pa dedicase a llabores que tendríen que tener reconocimientu social y institucional. Una soledá que tien causes -la mesma visión que los asturianos tenemos de nós y les nuestres coses- y culpables, los administradores de les instituciones, más atentos a la güelga que cualquier famosu dexa peles casi d'Uviéu qu'a los fíos del país que contribuyen a la so riqueza espiritual.

La crónica d'esi accidente y de la perda de dos asturianos singulares vieno siempre acompañada (yera lo mesmo'l mediu de comunicación qu'ún consultase) cola quexa pol pocu apreciu institucional y social de la xera que los dos entamaren va yá munchos años, del llamáu de los collacios nesa xera pa que la sociedá entera-yos dedicare más atención, de los familiares nel mesmu sen, y hasta de delles autoridaes pa que s'entamaren yá homenaxes y reconocimientos dende les instituciones. Una rara unanimidá qu'asoleyaba la realidá d'unos asturianos que trabayen en silenciu, con gran calidá les más de les veces, y cola recompensa namás de los que 'consumen' esi trabayu cultural o intelectual, pero cola indiferencia, cuando non el despreciu, de les instituciones y los 'líderes' de la opinión asturiana. La nómina de les persones que n'Asturies se dediquen a la cultura, la investigación o les artes fuera del focu de la emponderanza colectiva ye interminable, asina que nun ye cosa de citar a nenguna en concreto, pero sí se puede falar de les xeres que desendolquen pa dase una idea de la realidá asturiana que ta arrequexada como efectu de la malura del 'provincianismu'.

La música asturiana, de la qu'Igor y Carlos yeren exemplos campanudos, ye una d'elles. Decenes de grupos y otros tantos solistes lleven trenta años (o más) produciendo cultura d'altor internacional, non solo pol xuiciu soxetivu del qu'esto escribe, sinón pol apreciu que n'otros países se tien al so trabayu. Ello, amás de contribuyir mui notablemente a emburriar la llingua asturiana como mediu de comunicación universal con un llabor impagable pa la supervivencia del idioma. Sobra dicir cómo traten les instituciones a la música asturiana: contraten primero a la folclórica andaluza que más llingua gaste contando so vida peles televisiones qu'al más emponderáu gaiteru al que llamen d'Escocia, Francia o Australia pa sentilu tocar. La lliteratura asturiana ye igual el paradigma de los asturianos arrequexaos, con obres d'una calidá que namás somos a reconocer cuando contaes versiones en castellano tornen a nós pingando coles gotes del apreciu de los críticos madrileños o barcelonís, cuando muncho enantes les teníemos n'asturiano nes nuestres llibreríes. Lliteratura qu'amás tien qu'aguantar l'estigma de la sovención del dineru públicu, cuando la que recibe l[a lliteratura en castellano ye infinito mayor. La investigación etnográfica, y la recuperación del nuestru patrimoniu de la cultura material y inmaterial, ye quiciás l'exemplu más sangrín, con innumerables asturianos que dediquen vides y faciendes a rescatar de la muerte les amueses de la cultura tradicional a piques yá d'esaniciase. Museos etnográficos, colecciones privaes, trabayos d'investigación, recoyida de materiales, engarradielles pa que nun se balten ayalgues, son xeres que s'entamen en soledá y cola incomprensión d'una parte de la sociedá que recibe de les instituciones el recáu de qu'eses persones son seres raros, enfotaos en coses del pasáu, y los que tenemos, como muncho, qu'aguantar con paciencia.

Podríen ponese munchos más exemplos de disciplines onde pasa lo memos, son centenares los asturianos que trabayen por una sociedá espiritualmente más rica fuera dafechu de la consideranza de les instituciones (el Gobiernu asturianu, los ayuntamientos y nun digamos nada la Universidá), de los 'líderes' d'opinión y de bona parte de la sociedá, toos ellos más enfotaos en cualquier productu foriatu. Igor Medio y Carlos Redondo son exemplu, por desgracia y contra la so voluntá con una muerte que los alcontró abondo ceo, de munchos asturianos arrequexaos (músicos, escritores, folcloristes, arqueólogos, etnógrafos, investigadores, etcétera). Sirva l'homenaxe a estos dos ciudadanos como empiezu p'asoleyalos a toos ellos y sacalos del so requexu.