Carta abierta a los delegaos del Congresu de la FSA-PSOE

Los socialistes tenéis una cita cola hestoria y una gran responsabilidá pa da-y futuru al asturianu esta fin de selmana

Inaciu Galán
INACIU GALÁNPresidente de Iniciativa pol Asturianu

Un grupu de militantes de la FSA-PSOE, Socialistes poles oficialidá, tresversal, formáu por militancia siguidora de los dos candidatos que se presentaben nes primaries, vien trabayando la sensibilidá de los militantes y los cargos del so partíu pa convencelos de que la postura más razonable y razonada alredor de la situación del asturianu, ye apoyar la oficialidá. Y paez que nun-yos va mal. Consiguieron sumar a les agrupaciones que representen al 70% de la militancia del partíu, amás de la yá hestórica postura d'apoyu de les Mocedaes Socialistes d'Asturies, la sectorial autonómica d'educación y la única ya importante corriente interna, Izquierda Socialista. 20 agrupaciones lleven al congresu un testu idénticu y consensuáu que diz lo que ye obvio: qu'un partíu como'l PSOE, que n'otres cuestiones construyó importantes llogros na reconencia de drechos civiles, nun pue siguir dempués de 35 años nuna postura que contradiz los sos principios y que nun representa lo que piensa la so militancia y la mayor parte de la sociedá asturiana.

La situación del asturianu ye mala, necesita midíes urxentes. Y nun tenemos más que siguir les víes que marca la Constitución española nel so artículu 3.2. Nun ye nada raro, ficiéronlo en Galicia, con Fraga (poco sospechosu de ser nacionalista gallegu), en València, en Balears... y en tolos territorios con otra llingua propia xunto al castellán. Y el PSOE, nesos territorios, apoya a les sos llingües y les midíes que les normalicen na sociedá. Nun pue ser Asturies la escepción. Necesitamos consensos. Esta ye una cuestión tresversal que yá suma a 17 de los 45 diputaos de la Xunta Xeneral, de trés partíos distintos. Pero nun ye abondo, necesitamos el papel de la FSA, del partíu que lleva siendo llider la mayor parte de los cuasi cuarenta años constitucionales n'Asturies.

El vuesu secretariu xeneral, Adrián Barbón, yá se mostró abiertu a que se produza'l diálogu y la militancia fale y decida. Les agrupaciones yá mostraron un apoyu arrollador. Y ehí ye onde tu, delegáu o delegada nel Congresu del FSA-PSOE, tienes el to papel na hestoria. Esta fin de selmana los socialistes vais tener una oportunidá única de cambiar el rumbu del asturianu y con ello responder a una demanda hestórica y de xusticia, que supón más igualdá, mayor protección del patrimoniu cultural d'Asturies (y por tanto d'España, d'Europa y del mundu) y la fin de la falta de drechos xurídicos plenos pa los falantes d'asturianu. Nun duldéis en votar a favor de la enmienda propuesta pola vuesos compañeros de Socialistes pol asturianu, porque vien técnicamente preparada pa buscar un modelu propiu y progresivu d'oficialidá p'Asturies, y porque vien con un sofitu de la militancia que poques cuestiones van llevar a esti Congresu.

La FSA-PSOE tien la oportunidá agora d'abandonar les postures contraries a la oficialidá, qu'acerquen más al partíu a les agresives postures de Mercedes Fernández y la drecha más rancia, y sumase a la oficialidá, como se sumó la formación a los grandes consensos alredor del asturianu nel pasáu, como la creación de l'Academia de la Llingua Asturiana, la inclusión de la protección al idioma nel Estatutu o la entrada del idioma como asignatura nes escueles allá pel añu 1984. La sociedá asturiana espera muncho d'esti congresu y el simbolismu de sumase al consensu alredor de la oficialidá aprobando esta enmienda va xenerar entusiasmu y la certeza de qu'hai cambios na FSA. Los socialistes tenéis una cita cola hestoria y una gran responsabilidá pa da-y futuru al asturianu esta fin de selmana. Nun desaprovechéis la oportunidá. L'asturianu necesítavos.

Contenido Patrocinado

Fotos

Vídeos