EN política, la llinia recta nun ye la más curtia ente dos puntos, la llinia recta suel ser la qu'acaba en llaceria y estrozu. Hai políticos de llinia recta qu'enxamás se salen de la marca que los empobina al oxetivu últimu y, nesi camín, truñen escontra tolo que se-yos ponga per delantre, especialmente escontra la realidá de les coses. Y hai otros políticos que saben que la vida, y la historia, tien curves y que, si nun se tienen en cuenta, los perxudicaos van ser los seres humanos d'a pie, que van cargar coles consecuencies d'esa testonería.
Cumpliéronse esti día, el ventidós d'agostu, setenta años del fusilamientu del políticu asturianu Melquíades Álvarez, seguramente ún de los pocos homes públicos qu'aborrecieron de la llinia recta naquel primer terciu del sieglu venti español, onde los totalitarismos guañaron n'Europa ente la indiferencia de la mayoría. Don Melquíades escorría un ideal, un suañu qu'acolumbraba allalantrones, dacuando ñidiu y al algame la mano, dacuando esñidiosu y crespu, el d'un Estáu modernu, de democracia, laicismu, representatividá soberana, progresu económicu y xusticia social. Pero supo bien ceo que la llinia recta nun yera'l camín más curtiu p'aportar a esi ideal que primero se tropezó con una monarquía ignorante y ciega que vivía coles rentes y privilexos del sistema de la Restauración, depués, brevemente, cola dictadura de Primo de Rivera, más allá con una República que quería atayar y recatiar tolos sieglos d'atrasu español nun sospiru y, finalmente, cola reacción militarista y eclesial qu'entamó la Guerra Civil. Imposible, dicen los historiadores, ente tanta llinia recta, face-y camín a un personaxe como Melquíades Álvarez, que nun allampiaba por imponese al contrariu y que cuidaba muncho que los procesos de reforma que-y facíen falta a la sociedá española d'ente sieglos se ficieran ensin estrozar más de lo que se pretendía iguar, porque la primer obligación d'un políticu honráu ye nun crear más problemes que los que yá nos enseña la realidá.
Melquíades Álvarez entamó y fue cabezaleru de la fuelga asturiana de 1917, porque les condiciones sociales de los trabayadores taben allancaes nel sieglu XIX; quixo reformar la monarquía alfonsina pa facela un Estáu constitucional de llibertaes y progresu y porque a él, como a munchos, dába-y igual rey o presidente de la República si los drechos de les persones se salvaguardaben, y criticó y pidió mano dura cola Revolución de 1934 porque empobinaba a otru totalitarismu. A Melquíades Álvarez orielláronlu nel partu de la República porque pa dellos de los promotores aquella nun yera la estación cabera onde tendríen que trunfar la llibertá y el derechu, sinón una etapa más p'algamar una utopía totalitaria; renegó de la Constitución republicana porque dicía que nun taba fecha pa toos, que taba fecha por una parte contra la otra, y asesináronlu representantes de los miles de persones a les qu'ayudó pa que salieran de la esclavitú de la oligarquía española. Pa la política de llinia recta, la trayectoria del tribunu asturianu tuvo siempre demasiaes curves, y por eso la reivindicación de la so figura ye difícil hasta güei porque mui pocos son quien a asumila dafechu y el so legáu ta secuestráu por una fundación del PP, partíu que nada tien que ver colos sos ideales.
El reformismu melquiadista tenía asientu n'Asturies, yera heriede del republicanismu federal decimonónicu y dependía dafechu de la fuerza y de la palabra del so líder. A poco y a poco foi amatagándose ente'l baturiciu de violencia de los años trenta y dexó a don Melquíades hespicianu, non de razones, pero sí d'oyíos que quixeren escuchales. Mientres tanto y non, los políticos de llinia recta facíen la so revolución, nacionalcatolicista o bolchevique o eskalduna, y los seres humanos d'a pie pagaben les consecuencies en vides humanes, llaceria moral y material. Reivindicar el personaxe históricu de Melquíades Álvarez como adelantáu del constitucionalismu español de 1978 o, más en xeneral, de la democracia española que truxo la Transición ye un anacronismu, puede que con bona voluntá, pero un anacronismu.
España güei, y nun digamos nada Asturies, ta enllena de políticos de llinia recta que quieren atayar escaeciendo a les persones, a los ciudadanos a los que dicen servir. Bien ta que nos alcordemos de tribunos como don Melquíades Álvarez, anque a munchos nos manque'l so escaezu d'Asturies y 'lo asturiano', y tratemos d'atopar na política asturiana dalgún representante que nun se dexe llevar pola llinia recta, que sepa ver les curves de la historia y tomales con seguranza y ésitu. D'otra manera, d'equí a unos años atacarános la señaldá, como en tantes otres coses, de dexar pasar a un políticu que sabe construyir ensin estrozar al tiempu lo que yá tenemos.
