A fines de la segunda década del sieglu XX endulzaben les páxines de la prensa asturiana les primeres viñetes d'Alfredo Truán Álvarez (1895-1961). La pluma del pintor y dibuxante xixonés, que collaboró con publicaciones como 'El Sol', 'La España Gráfica' y EL COMERCIO, da fecha de nacimientu al cómic en llingua asturiana, un xéneru que, camín del so centenariu, investiguen anguaño Chechu García y Próspero Noel García (el primeru, profesor en Ventanielles y el segundu, docente invitáu en Masachusets). Ayeri dieron una conferencia na Casa la Cultura Marta Portal de Nava, dientro de los actos de la XXVIII Selmana de les Lletres Asturianes.
'El Gaviotu', de Juan Martínez García-Rovés; Pinón, Telva y Pinín, d'Alfonso Iglesias López, y Xuanón, d'Adolfo García son los personaxes y los autores cimeros del cómic de la tierra nuna primer dómina de tintes costumistes y humorísticos, con otros creadores importantes como Manuel Rodríguez Lama 'Marola'. Chechu resalta'l fechu de que toos ellos utilizaben l'asturianu pa comunicase colos llectores. Nel casu d'Alfonso, cuando empezó a collaborar con periódicos madrilanos como 'Pueblo' o 'Abc' «pasó al castellanu, anque siguía usando espresiones n'asturianu entecomillaes».
L'escritor y profesor de L'Entregu siñala que cola llegada del Surdimientu, a mediaos de los años 70, el xéneru esperimentó «un cambiu radical». Surdieron revistes, fanzinos y publicaciones especializaes como 'El Llapiceru' o 'El Gomeru', colos que'l cómic enanchó la temática, que va del terror a la variante histórica. Nesa dómina destaquen los nomes de Neto (collaborador de 'La Voz de Asturias' y del selmanariu 'Les Noticies'), l'escritor y dibuxante Miguel Solís Santos y l'etnógrafu Alberto Álvarez Peña, «un magníficu ilustrador y tamién autor de munchos comics», recuerda Chechu, que resalta tamién la figura de Gaspar Meana, collaborador d'esti periódicu y autor de la monumental 'Crónica de Leodegundo' (Llibros del Pexe), qu'en ventincinco volumes de 48 páxines caún narra fechos históricos d'Asturies, Europa, el Magreb y Oriente Prósimu a lo llargo de 180 años (sieglos VIII y IX). Una obra como ésa ye envidiada por cualquier otra llingua y «había que colga-y medalles al so autor». La especialidá histórica tien otros cultivadores, como Javier Marinas García, autor de 'La vida de Gonzalo Peláez'.
De la tercer y hasta agora última dómina, Chechu García cita a Ígor Medio (dibuxante y músicu de Felpeyu fallecíu n'accidente de tráficu va un añu), Sergio Bances, Enrique Carballeira, Alberto Vázquez, Ruma Barbero o Germán García, qu'asitien «mui altu'l nivel. Ye'l momentu onde hai más autores, tamos viviendo un segundu Surdimientu».
Premios y biblioteques
¿Nun hai muyeres nel cómic n'asturianu? «Sí, sí les hai. En 'El Gomeru' ta Llucía Bande, van saliendo nomes nuevos nel Concusu de la Comarca de la Sidra y el primer cómic manga n'asturianu ye obra de dos muyeres, Mari Luz Pontón como guionista y Ángela Fernández como dibuxante», siñala l'escritor entreguín, que ve con normalidá qu'esi estilu xaponés d'historietes llegue a Asturies, porque «l'asturianu va garrando les corrientes internacionales. El manga llévase nos Estaos Xuníos y n'Europa y equí tamién tenía qu'apaecer. Los nuesos autores viven nel mundu actual».
Chechu cuida que'l cómic n'asturianu ye «un xéneru apasionante y mui poco esploráu qu'evoluciona al empar d'otres artes y de la lliteratura» y pide a la Conseyería de Cultura del Principáu y a l'Academia de la Llingua la creación de premios específicos pa reconocer el trabayu de los dibuxantes. Amás, reclama más enfotu de les editoriales y una mayor presencia nel sistema educativu. «Los comics han de tar nes biblioteques de los colexos y de los institutos», diz.
