Va unos meses los telediaros abríen cola noticia del primer discursu de doña Letizia en catalán. Amás, ye habitual ver al Príncipe falando n'esta llingua y en vascu o gallegu n'actos oficiales. Por embargu, la Princesa d'Asturies, que presume d'asturiana, nun usó tovía en nenguna ocasión l'asturianu. Precisamente ayeri-y regalaben a la Princesa dellos llibros de María Josefa Canellada n'asturianu.
Hai que recordar amás, que la so güela, Menchu Álvarez del Valle, y la so tía güela, Marisol, grabaron nos años sesenta unos discos recitando poemes n'asturianu. Los asturianos deberíemos reclarmar a la Casa del Rey que los Príncipes, que lleven el nome de la nuesa comunidá, usen la nuesa llingua tamién, igual que lo faen coles demás llingües minorizaes del Estáu. Y amás, los nuesos representantes políticos deberíen ser los primeros en dar exemplu.
