D ÍA de Pascues, esti xueves de d'atrás, pa la llingua asturiana. O día de pocu, según se mire y, sobremanera, según el que lo mire. Abulta que l'enxertamientu, pola primer vegada, de los estudios reglaos d'asturiano na Universidá ye lo menos de lo más que se podía llograr, o lo más de lo menos que dellos taben dispuestos a conceder. En cualquier casu, ye pa ponese gayoleros, teniendo en cuenta los trabayos que lleva avanzar un plizcu siquiera pa facer normal l'idioma del país. Atrás queden sucesos que convién nun escaecer, como esa actitú montuna del profesor Félix de Castro, representativa de xuru d'otres tantes ente los sos collacios de profesión, que de verdugu quixo pasar a víctima, y faltó-y un rispiu pa llogralo. Qu'esti ésitu, indudable pa los que quieren espresase, vivir o, simplemente, conservar la llingua asturiana viva, nun anubra tampoco'l llargu camín que queda per delantre.
El primer entamu de la qu'entós yera decana de la Facultá, Ana Cano, y al tiempu presidenta de l'Academia de la Llingua, los comentarios d'aquel fracasu, la dimisión de la decana, el nomamientu del sustitutu, la nueva propuesta y, al cabu, l'aprobación con votos asgaya fueron acontecimientos toos que dibuxaron, más que nunca, dos grupos ente los partidarios del asturiano (nesti casu, del so estudiu regláu) con dos visiones desemeyaes, non del idioma, pero sí de cómo enfrentar la so normalización, nel sen más políticu. Simplificando, tenemos ente los favorables a la normalización del asturiano a unos que son ferres y a otros que son palombes. Los primeros ven esti minor insuficiente y hasta dacuando peor que la situación precedente; los otros faen folixa por esti avance y dan-y tanta importancia al conteníu (creitos, hores lectives, etcétera) como al elementu simbólicu del asturiano entrando, con toles de la llei, na Universidá. Pero les valoraciones sobre esti asuntu en particular espúrrense hasta tocar cualquier otru aspectu del mesmu tema, y componen un cuadru de disidencies dientro del asturianismu que ye de preocupar.
Hai, asina, xente que camienta que'l llabor que se tien que facer p'algamar los derechos llingüísticos ye'l de presionar hasta baltar les resistencies de los contrarios y que, afogaos por una opinión favoratible mayoritaria, se dean a la concesión de lo qu'entós sedrá yá inevitable. Otros, en cambiu, camienten que'l mesmu llabor tien que ser el de buscar puntos d'alcuerdu y consensu que vaigan, a poco y a poco, texendo la rede qu'un día faiga de la llingua asturiana un idioma superviviente nel sieglu XXI y de los sos falantes ciudadanos normales, con tolos derechos, conscientes y ensin complexos. Ye difícil saber si lo más amañoso yera pidir el maior, o una versión más ambiciosa que l'aprobada, o lo meyor yera proponer el minor, pa dir depués ganando otru puquiñín de tarrén. Puede, igual, qu'a nenyure empobinen mesmo un camín que l'otru.
P ero eses dos maneres de ver la reivindicación del asturiano actúen con milimétrica convicción pa con estes dos táctiques, tanto, que delles vegaes escaecen, unos y otros, la esencia fundamental de la reivindicación que los anima. Hasta plasmante ye ver cómo dalgunes persones, col pasar de los años, camuden de bandu, pasando de ferres a palombes, o de palombes a ferres. Y entós engárdense dende la nueva bandería col mesmu rixu (pa defender cuálu ye'l xeitu más amañosu pa que «nos faigan casu») col que lo facíen primero dende la trinchera d'enfrente. Los dos bandos, los del minor y los del maior, los de nun collaborar pa nada col gobiernu de turnu y los de llegar a participar nél, los que tán subvencionaos y los que non, los que ganen premios lliterarios y los que nin siquiera se presenten a ellos, los que glayen y los que callen, lleguen al estremu de negar los ésitos que-yos abulten inspiraos pola táctica de los otros y d'allegrase de los fracasos cuando asoceden. Los derechos llingüísticos de los asturianos dependen de la llei y del gobiernu que la aplica, y estes dos coses son competencia d'un parlamentu escoyíu pola voluntá popular. Si dalguna esperanza tienen entá los del Minor y los del Maior de llograr un día la oficialidá del asturiano, ye a los votantes a los que tienen qu'apelar convenciéndolos de que tienen derechu y de que lu tienen que reclamar, pa nun ser unos ciudadanos de segunda en so propia casa.
