L OS asturianos, y otros munchos pueblos peninsulares, cuantisimayá, centuries cuando menos, que destronamos al gochu como tótem de la nuestra cultura. Per estes tierres amás punxímos-y pedestal a la vaca, que fue como de la familia y, a vegaes, hasta la familia mesma, y más modernamente tamién baltamos al bovinu pa engolar nel altar del nuestru asuetu, especialmente del ociu de los madrileños, al osu, aquel animal míticu que mataba reis y que naide nun volviera ver hasta que nun cayó pel pueblu'l Circu Rusu. Del gochu al osu, pasando pela vaca, va la verdadera historia d'Asturies, quedando pel medio la oveya xalda y la pita pinta y otres races de menos cuantía, de les que nun queda tanta documentación como divinidá alimenticia. Y agora, el declinar imparable del gochu acusa un güelpe mortal cola gripe mexicana, yá lo verán ustedes.

Hasta esti día, la desgracia del gorrín corría paralela a los descubrimientos de la melecina, al colesterol, a les arteries tupíes, a la obesidá, a los perxuicios de la grasa. La matanza dexó de marcar el calendariu a mediaos del sieglu pasáu, pasó de moda corar gochos, a los animales hai que matalos en mataderu con métodos indoloros y'l consumidor namás quier ver el productu final envasáu al vacio. A los neños hai qu'esplica-yos que los embutíos sáquense d'esi ser tan asemeyáu a los humanos, pa que nun se faigan la idea de que se dan en güertes o los fabrica una máquina. Nada que dicir. La nuestra traición al gochu, en realidá, ye dietética y posmoderna, pero vergoñosa, porque eso nun quita pa que les caseríes de Lleida críen animales a decenes de miles y'l xamón andaluz, extremeñu o turolense, seya una relixón gastronómica de nuevos ricos. Pero lo de la gripe mexicana ye otra cosa. Por ella nos enteramos de que'l gochu ye'l meyor 'reservoriu' (namás la palabra da noxu) de virus patóxenos pal ser humanu; de que nel nuestru amigu milenariu pueden sobrevivir y mutar y ponese poderosos y agresivos nuevos virus que depués, un día cualquiera, nos ataquen a nós, en vista de lo baxes que tenemos les defenses.

¿Cómo podrá'l gochu remontar esta campaña de desprestixu? ¿Seguirán otros países l'exemplu d'Exipto, que sacrificó a tolos animales? ¿Tendrá razón l'Islam (tamién el xudaísmu), que lleva más de mil años avisando de la 'impureza' del gochu y prohibiendo los sos placeres? El 'Sus scrofa', o 'Sus domesticus', lleva cinco mil años acompañando a la humanidá, dándo-y alimentu, pero hasta va bien poco nun sabíemos lo asemeyáu que yera a nosotros, anque lo camentásemos: omnívoru, berrón de neñu, puercu... Depués vinieron los asemeyos fisiolóxicos, los esperimentos pa usar los corazones del xabalín domésticu pa remplazar a los humanos inservibles, etcétera.

T ien la gripe mexicana -ven que me resisto a llamala porcina- unes consecuencies pa la humanidá tovía por midir, y tamos estos díes nesi paréntesis que puede desembocar en que nun pase nada grave (ensin amenorgar la importancia de les víctimes confirmaes) o en que'l virus se ponga entá más fachendosu y acabe por facer una llaceria curiosa de nivel planetariu. Nel primer casu, pasaremos selmanes discutiendo si dalguién desaxeró l'alarma y por qué escuros intereses lo fizo; nel segundu, el planeta enteru pondrá a preba'l sentíu común y l'instintu de supervivencia. Pero, en cualquier casu, el probe gochu yá nunca enxamás podrá soñar con recuperar el tronu, agora yá nunca enxamás dexará de ser un 'reservoriu' de virus potencialmente dañibles pal ser humanu, a los xamones, chorizos, llacones y adobos munchos yá nun los mirarán igual.