E N pasando la Selmana de les Lletres, y'l correspondiente Día del mesmu nome, podemos referinos a estos trenta años de celebraciones de la lliteratura asturiana y alegranos de dos o tres noticiuques. De los actos oficiales hai felicitase por volver -yá l'añu pasáu lo ficieron con María Teresa González- a rescatar una figura de la lliteratura asturiana. Esta vegada'l 'descubrimientu' de la pieza 'Viaxe del tíu Pacho el Sordu a Uviedo' punxo mui a propósito alcordase d'Enriqueta González Rubín, y, como abulta que dalguién tien una obsesión por que toles Selmanes de les Lletres se dediquen a muyeres (eso nun ye criticable, ye una obsesión como cualaquiera otra), el destín regaló por desgracia va poques selmanes una nueva oportunidá y l'añu qu'entra pueden dedicá-ylu a Nené Losada, más que merecidamente. Otru cantar ye la presencia nel programa d'actos de la escritora Ángeles Caso, a la que nun-y alcontramos relación cola lliteratura asturiana. Del Día de les Lletres (propiamente l'actu de l'Academia de la Llingua), impresiona como siempre la escenografía, la seriedá de la presidenta, vistída col traxe del país, y la presencia de les fuerces vives de la política, incluyíu Javier Fernández, el secretariu de la FSA, ési que camienta que los presentes nel teatru Campuamor quieren obligalu a falar bable. Esi conceyu lleva trenta años siéndolo too: la defensa del idioma, la de los derechos llingüísticos, la de la lliteratura; la xunta añal del asturianismu colos sos neofalantes urbanos; la del nacionalismu políticu; la de la tradición y'l folklore... Munchos ingredientes pa una pota namás, por mui grande que seya.
El discursu del nuevu académicu, el gaiteru José Ángel Hevia, pidía la xuntanza de tolos defensores del asturianu pa escentellase, xuntos tamién, nel cuadriláteru electoral cola llingua oficial como bandera única. Una idea valiente y coraxuda qu'amuesa lo poco que sabe Hevia de política. Javier Fernández de xuru que resfregaba les manes de contentu na escuridá del palcu reserváu a les autoridaes.
T res noticiuques pueden danos perspectiva d'estos trenta años de lletres asturianes. Una, la publicación nunos meses d'un trabayu discográficu del cantautor Toli Morilla con versiones del cantante Bob Dylan n'asturianu, depués de recibir permisu de quien quiera que tenga los derechos de la so obra güei. Dos, l'anuncia de la mesma Ana Cano, nel actu del Campuamor, de que'l fondu editorial de l'Academia de la Llingua va ponese a disposición del mundu na ferramienta de la rede Google Books. Tercera, la posible publicación de la saga de Harry Potter en versión asturiana. Si facemos comparanza, ye increíble lo qu'esi conceyu del Día de les Lletres llogró nestos trenta años. Nesa pota con ingredientes y adobos tan desemeyaos, onde los gaiteros métense a políticos, los políticos a llingüistas, los llingüistas a poetes y los poetes a maestros de primaria, balte sicasí una idea xusta y honrada que ye la que caltién a tanta xente, una xeneración depués, cola mesma reivindicación. Pueden, los asistentes de tantos años, tar gayoleros.
Agora, que dalguién se figure aportar a casa, abrir la puerta y ver, en riba la mesa, un ordenador prendíu con una búsqueda nel Google Books d'un llibru n'asturianu, nel equipu de música a Toli Morilla cantando a Bod Dylan n'asturianu, a una neña o rapacina con Harry Potter en versión astur sentada en sofá... Que dalguién faiga comparanza con va trenta años. Namás queda que la RTPA emita n'asturianu.
