Ayeri morrió un amigu, una persona cola que coincidí cientos de veces y que más nunca voi volver a ver. Morrió Nel Amaro, un poeta que fixo de la vanguardia proa y que s'atrevió nel esfuerzu de dir más allá nel pensamientu poéticu. Yo recuerdo, allá pelos primeros 80, cuando llegaben noticies d'un Mieres fértil: revistes lliteraries como 'Malku' o 'Cuélebre literario', que guardo ente l'oru sentimental de l'alcordanza, traíen noticies de poetes como Lourdes Álvarez o Xosé Antón García. Detrás d'elles, axitador del alma, taba Nel Amaro, un poeta que pronto lleí, colos mios 15 años, en dos llibros en castellanu que tovía resisten al tiempu: 'Habitación de poeta' y 'Boca arriba, lentamente, naufragando'; irreverentemente tienru, Amaro yera un artista tan inquietu que nun ocupaba'l sitiu qu'ocupaba. Nun hai ironía nenguna nesta frase qu'acabo de dicir: seguramente por proyección y introspección, por ambición de la obra artística considerada como una ampliación d'un yo que s'arrama pa facer meyor la sociedá na que-y tocó vivir, Amaro ye'l poeta con más fondura de los pioneros que nos 70 emprimaron a escribir n'asturianu. Pero esto raramente se reconoz porque Amaro nunca quixo ser historia sinón presencia viva contradiciéndose.
Dramaturgu y novelista, artista plásticu y performer, collechó éxitos internacionales nesta última disciplina. Tamién tenía fuera d'Asturies, como pudi comprobar en más d'una ocasión, fieles siguidores de les sos lletres, como los cómplices de la banda del grupu Zurgai de Bilbao. Yera humilde, yera de Mieres: echó más tiempu n'animar a los otros que n'animase a él. Yera grande nel sentíu asturianu y grande nel sentíu áticu.
Yera Nel Amaro ún de la banda que siempre prestaba atopar. Bon home, intentó asomase nesta esquina de la tierra a una verdá más profunda; pue ser que la viera per una resquebra, pero vióla. Y eso ye ver más de lo que munchos ven na vida.
