Asina, como reza'l titular, podemos acabar los asturianos a cuenta de l'actitú del nuestru Gobiernu y la nuestra oposición, entrambos los dos infestaos del virus del interés particular que los afalaga y los aguiya. Vamos ver. Los primeros madreñazos cáennos enriba a tolos ciudadanos con un presupuestu refugáu y con unes elecciones anticipaes depués, en medio de la fola inmensa d'un paru que cabalga desbocáu hacia los cien mil. Si la decisión de Cascos de llamanos a votar tien l'apariencia impecable de la pura democracia (¡cuántes veces pidimos equí que se nos dexase convocar elecciones cuando quixéremos, y non cuando nos mandaben), tamién ye verdá que nos abulta una decisión planificada, estudiada y executada con frialdá maquiavélica. Asina, el Gobiernu forista preparó adréi un presupuestu imposible d'aprobar con grave quebrantu pola oposición, y ésta, escaeciendo toles coses que tenía dicho cuando-y tocaba ser gobiernu, refugó les cuentes públiques pa nun dar encontu al fenómenu electoral casquista. Porque, cuando ún gobierna, el presupuestu sirve pa la inversión y l'empléu, y cuando ún ta na oposición, namás val pal clientelismu y la perpetuación nel poder. ¿O ye al contrario? La única aprobación responsable de los presupuestos que se fizo na democracia asturiana protagonizáronla, al empar, Sergio Marqués y'l PAS de Xuan Xosé Sánchez Vicente a mediaos de los años noventa, y yá sabemos pa qué-yos sirvió tanta xenerosidá delantre de la opinión pública.
Los segundos madreñazos son los que nos dan nel nuestru orgullu y autoestima los opositores d'izquierdes, especialmente en Xixón y Avilés, cuando la xestión forista truñe escontra'l Niemeyer y'l Festival de Cine de Xixón (FICXixón). Yera d'esperar que los usufructuarios del réximen afitáu tantos años pol PSOE, IU y los sindicatos se remontaren cuando otru gobiernu, el que fuera, xorrascase nes sos llórigues y los punxera albentestate, pero lo que nun tien tanta esplicación ye que nun guardasen más argumentu pa reivindicase que la victimización de «lo asturiano» con esa metáfora tan vieya de la madreña. Puede ún alegrase, o non, de que'l Niemeyer tea agora vaciu y silenciosu, aguardando enllenase d'otres voces, otros trastes y otru públicu; puede ún alegrase, o non, de que José Luis Cienfuegos yá nun seya director del FICXixón, de que vuelva Juan José Plans y a los de siempre los reemplacen otros con vocación de ser tamién los de siempre. Pero ¿por qué nos tienen qu'insultar a los asturianos mentando la madreña, y la boina, y la fesoria, ¡y hasta'l bable! al escolforase contra'l conseyeru Vallaure o'l conceyal Rubiera?
Ellos engárdense, atacaos pol virus del so interés en quedase, n'afayase más definitivo na columna inclemente del poder, o contaminaos del síndrome d'abstinencia que se padez en posándose depués de tantos años de tener el boletín oficial garráu pel mangu. Y a los asturianos lluévennos los madreñazos económicos y emocionales, quedamos cada día más probes material y espiritualmente, sabiendo, como sabemos pa enriba, que la culpa ye nuestra porque somos nosotros los que los ponemos onde tán col arma individual del votu qu'otra vegada, y ensin gana, vamos poder azotar contra los nuestros intereses esti marzu que vien.
P. S.: Entérome de la defunción, en papel cuando menos, del selmanariu 'Les Noticies', pioneru y decanu al tiempu de la prensa n'asturianu. Una llástima y una esperiencia de la qu'un día d'estos, con él tovía de cuerpu presente, podremos sacar delles conclusiones.
