«Ye obligación de la Universidá atender, cultivar y difundir la llingua»

El rector Santiago García Granda, entrando nel salón d'actos del Muséu Arqueolóxicu d'Asturies./Álex Piña
El rector Santiago García Granda, entrando nel salón d'actos del Muséu Arqueolóxicu d'Asturies. / Álex Piña

Na primer conferencia d'un rector n'asturianu, García Granda reivindica'l so deséu d'implantar un grau en Filoloxía Asturiana

ALBERTO ARCE

«'Na vida nun hai nada que tarrecer, solo hai que comprender'». Con una cita de la dos veces ganadora del Nobel Marie Curie, esti xueves, el rector de la Universidá d'Uviéu, Santiago García Granda, convirtióse nel primeru de la so autoridá en dar una conferencia dafechu en llingua asturiana nos más de 400 años d'historia de la institución.

Nel salón d'actos del Muséu Arqueolóxicu d'Asturies, el rector tuvo acompañáu de colegues y familiares. Na mesa, fueron Fernando Padilla, director xeneral de Planificación Llingüística y Normalización del Principáu, ya Ignacio Alonso, director del muséu, los escoyíos pa presentalu énte l'audiencia.

'Notes sobre la investigación na Universidá d'Uviéu' fue'l títulu d'una intervención centrada en poner enriba la mesa'l llabor investigador de la Universidá d'Uviéu y en dar valor al asturianu como llingua «tresmisora de cultura». L'actu encuadróse nel octavu 'Día de les Ciencies Asturianes', desendolcáu pola Conseyería d'Educación y Cultura. Tres cuartos d'hora que valieron pa que García Granda espunxere les cifres de la casa. «Tenemos 22.000 estudiantes, 1.867 investigadores, 7 campus en 4 ciudaes, 10 facultaes, 58 departamentos, 57 graos y 59 másteres. En 2017, la Fundación Universidá d'Uviéu soscribió un total de 434 contratos d'investigación, nos que participen 379 investigadores de 30 departamentos, asina como 301 entidaes de cálter públicu y priváu, 24 d'elles d'ambitu internacional». Tamién quixo dexar patente que nestos trés años, la institución pasó de «tocar fondu» en materia de personal y fondos a tar xestionando «seis millones d'euros».

Fernando Padilla, pela so parte, llamó a otres autoridaes a garrar exemplu de García Granda, que reconoció, en delles ocasiones, tar faltu de «dalguna qu'otra pallabra». Amás, enantes del actu, el químicu almitió, en declaraciones a esti periódicu, tar deseosu de que, «pocu a pocu» s'implante un grau en Filoloxía Asturiana na Facultá d'Humanidades d'Uviéu que se sume al minor (preespecialización) y al máster que yá ufierta la institución pa los estudiantes de dalguna de les filoloxíes. «La Universidá tien la obligación d'atender, cultivar y difundir la llingua asturiana», dixo.

«El futuru»

«Pa que'l futuru seya tal y como deseyamos, necesitamos científicos más conscientes de la proyección de les sos investigaciones, profesores de secundaria con conocimientos actualizaos, mozos con capacidá crítica, divulgadores, texíu productivu en contactu cola Universidá, ciudadanos más informaos y, en definitiva, una sociedá más desarrollada; una Asturies más desarrollada», clamó'l rector. Pa ello, según les sos propies pallabres, «el 40% de la ciudadanía nun puede dicir tar dafechu desinteresada de la materia científica», un datu que contrastó con que, n'España, el 30% de les persones creen que'l ser humanu coincidió en tiempu y llugar colos dinosaurios.

Síguinos en:

Contenido Patrocinado

Fotos

Vídeos