Borrar
El legáu vivu d'una escritora esencial

El legáu vivu d'una escritora esencial

Cúmplense los venticinco años de la muerte de María Teresa González y la so familia remémbrala recopilando toa la so obra

pablo antón marín estrada

Martes, 26 de mayo 2020, 02:01

Necesitas ser suscriptor para acceder a esta funcionalidad.

Compartir

El pasáu 23 de mayu cumplíense los venticinco años de la muerte d'una escritora esencial de la lliteratura moderna en llingua asturiana, la xixonesa María Teresa González. Autora d'una obra poética d'una singular intensidá espresiva y emocional, foi una de les primeres voces de muyer na xeneración del Surdimientu y tamién de les que más ceo empobinaron nel cultivu de la narrativa. Güei, sigue siendo una poeta viva a la que vuelven con gustu llectores y autores de toles andanaes xeneracionales, mesmo los que nin siquier nacieran de la que fueran escritos los sos testos. En 2008, la Conseyería de Cultura del Principaú dedicaba-y a la so figura la 29 Selmana de les Lletres y la so obra volvía a acoyer un nuevu interés. Agora, un cuartu de sieglu después de que nos dexara, la so familia remémbrala con una páxina web na que se puede acceder a la integridá del so llabor lliterariu n'asturianu, amás d'ufrir la so biografía, bibliografía y una completa amuesa de trabayos críticos alrodiu d'ella. Un homenaxe que val non namás pa da-y alcordanza sinón sobre too pa lleela con anováu interés.

Nacida en somantu d'una familia trabayadora nel barriu de Tremañes en 1950, cursó les sos primeres lletres nel colexu Les Maravilles y con 17 años entro a trabayar na empresa AEA Crady, na que diba tocá-y vivir y participar activamente nos conflictos llaborales que finaron col pieslle de la factoría. El desempléu encarrilóla a facese auxiliar de clínica, una profesión qu'había desempeñar hasta el so pasamentu en 1995. Casada col tamièn escritor Vicente García Oliva, tuvo al so llau una fonda implicación nel desenvolvimientu del asturianismu cultural al traviés de l'asociación Conceyu Bable. Los sos primeros poemes daten de 1984, pero diba ser tres años después cuando publique el so primer llibru: 'Collaciu de la nueche'. En 1988 va dar a estampa un nuevu poemariu: 'Ochobre' y en 1993 asoleya 'Heliocentru', la so última entrega poética, a la que diba siguir un añu más tarde el volume de narrativa 'La casa y otros cuentos'.

El so compañeru de vida, lletres y suaños, Vicente García Oliva afirma agora que «pa mi ye difícil separtar la so obra de la persona cola que conviví venticinco años, pero si tuviere que falar namás de la so escritura, lo que más me presta ye la emotividá que tien la so poesía, la que carga en cada versu y ye quien a espertar al que la llee. Tamién la so facilidá pa dignificar les coses cotidianes». L'escritor atopa nos sos testos «una presencia latente de la persona que quier tresmitir sentimientos amorosos o de desamor, los dos grandes temes de la poesía de Tere» y présta-y saber que la so obra remanez la complicidá de los autores más mozos: «Ye curioso porque hai una estremadura grande de tiempu ente'l que s'escribieron –trenta o cuarenta años– y el d'estes poetes. Dexó un posu que se recuerda y igual ye por esa capacidá de tresmitir emociones, dalgo que siempre ta per enriba les mode y puede espresase d'una manera o d'otra pero los sentimientos nun cambien», apunta.

La cotidianidá de la vida

García Oliva remémbrala como «una persona mui entregada a tolo que facía, lluchadora, na que la poesía yera una parte más del so ser, inda ella enxamás s'autodefinía como poeta, escritora, nin nada asemeyao. Como notó un críticu a esti propósitu, falaba d'ella mesma como en tercera persona y al escribir siempre caltuvo una cierta inseguridá. Fala d'ello en dalgún poema y ye rebuscando nos sos testo sonde se pueden alcontrar datos de la so personalidá». La de María Teresa González, taba bien llonxe de cualaquier enchipamientu vanidosu, como resalta el so compañeru: «Yera enemiga de cualaquier homenaxe o asuntu rimbombante, y agora mesmo taría de xuro llanzándonos improperios por recordala a esti nivel», señala.

En 2011 el Conceyu de Xixón púnxo-y el so nome a un parque en Tremañes: «Ya al llau d'onde nació y como dixe entós, ella armaría la de coyer si lo supiere, pero diba tar contenta de que los neños xugaren ehí a la pelota y a encestala onde ta'l so nome o que se-y posaren les palomes, la cotidianidá de lo que ye la vida», caltién l'escritor.

Qué fadrás

Qué fadrás

cuando la lluna españe

na xelada ariesta

del cristal que t'escuende.

Cuando irrumpa nes zunes apilando vasales,

visita indeseyable aruñando

nos álbumes, xurgando na memoria

de lo vieyo.

Qué tabla, xintada de povisa

t'apurrirá'l so allugu

a esi suañu perpetuu de calabres.

Reporta un error en esta noticia

* Campos obligatorios