Borrar
Marina Lobo, d' Impronta: «Lo importante ye siguir sacando novedaes y nun parar, porque los llibreros siempre les acueyen bien»a
Desescalada del llibru asturianu

Desescalada del llibru asturianu

Los sellos que publiquen en llingua asturiana, ente l'esmolecimientu y l'enfotu nes compres de fondos y les feries

PABLO ANTÓN MARÍN ESTRADA

Martes, 9 de junio 2020, 03:02

Necesitas ser suscriptor para acceder a esta funcionalidad.

Compartir

Les editoriales que publiquen en llingua asturiana recupérense pasín ente pasu del parón obligáu pol andanciu de la Covid-19 y viven la so particular desescalada poniendo otra vuelta en camín los títulos que quedaron atrancaos pol pieslle de les imprentes o marcando una data nueva pa la estampación d'aquellos otros que taben programaos alrodiu la Selmana de les Lletres. L'impactu de la crisis sanitaria nel so llabor amuesa unos perfiles estremaos en función del volume en catálogu de caduna d'elles, les sos propies característiques o los sos mesmos recursos, como pudimos constatar falando con tres d'elles.

Marina Lobo, responsable d'Impronta remembra que la pandemia «coyónos preparando los llibros que pensábamos sacar pa les Lletres y tuvimos de paralo too. Agora reanudamos la xera con 'Néctar duce son los llevantos' de Manuel García Menéndez o 'L'home que cava' de Ramón Lluis Bande y el siguiente títulu que vamos dar ye 'El raitán y el sangrín' de Daniel González Granda. Después del branu cuntamos publicar dos clásicos infantiles: 'El coríu feu' y 'Los tres gochinos', en versión d'Irene Riera». Pa la editora la posibilidá de que la Dirección Xeneral de Política Llingüística retomare l'adquisición de fondos destinaos a la so rede de biblioteques «ye evidente que diba suponer un bon apoyu. Feries como la de Xixón tamién pueden aidanos a respirar». Nel so casu, la vienda online mientres el confinamientu, foi «testimonial, porque tampoco ye una canal de salida a los nuestros llibros», señala. Lo importante agora, ye pa Lobo «siguir sacando novedaes y nun parar, porque los llibreros siempre les acueyen bien y unos títulos van aidando a abrise pasu a los otros».

Noticia Relacionada

Ediciones Trabe enfronta el so reiniciu con títulos nuevos: 'La colomina 36' de Nicolás Bardio y 'Superpoderes' de Miguel Rodríguez Montealvaro, xunta los poemarios 'Reflexones d'un cuerpu opacu' de Solinca Turbón y 'Na palma da túa mano' de Conchita Álvarez Lebredo. Mientres el confinamientu les viendes per internet foiron el so auténticu respiraderu y talo desvela «supunxeron inda más que les del añu pasáu nel mesmu periodu. Desque abrimos la llibrería, tamién tan dándose bien les viendes presenciales, como si la xente tuviere abonda necesidá de mercar novedaes. Nesi sen tamos contentos». De metanes quedaron «los títulos que publicamos a primeros d'añu y de los que nun pudimos facer presentaciones, colo qu'eso supón». El so enfotu ta puestu tamién nel oxíxenu que-yos ufiertaría una compra de fondos de la Conseyería de Cultura: «Ye dalgo que venimos reclamando toles editoriales dende va años y poles noticies que nos lleguen paez que dalgo hai en marcha nesi tarrén. Vamos esperar que seya asina». Prieto cuida que «tamién paez el momentu pa que toos nos sentemos a pensar qué más ye lo que se puede facer y lo que non».

Con menos enfotu s'amuesa Angela Sánchez Vallina, de la editorial especializada en lliteratura pa nenos y nenes, Pintar-Pintar. «Los nuestros llibros y en xeneral les obres n'asturianu van siguir saliendo, pero lo importante ye que puedan llegar a onde tienen de tar: biblioteques publiques, escolares y llibreríes. L'adquisición de la Conseyería faise una necesidá imprescindible agora más qu'enxamás. Nun tien sentíu que dean perres pa editar llibros y que queden nel almacén», opina. Mientres la pandemia el so sellu apostó por lliberar abondos títulos: «Tuvimos cientos de descargues y apoyos, pero eso nun se traduxo en viendes online». Cola so llibrería nel Centru Niemeyer trancada y tamién los espacios onde desenvolvíen los sos talleres infantiles de llectura, pa la editora «mientres volvemos a una cierta normalidá, la cuestión ye ¿qué vamos facer?, y nun ye un llamentu, ye una pregunta», afirma, coincidiendo na mesma reflexón que Esther Prieto.

Reporta un error en esta noticia

* Campos obligatorios