Secciones
Servicios
Destacamos
OSÉ LLUÍS CAMPAL FERNÁNDEZ
Martes, 24 de julio 2007, 03:07
Necesitas ser suscriptor para acceder a esta funcionalidad.
Compartir
Na cabera páxina del selmanariu del Oriente asturianu 'El Pueblo' del 19 de setiembre de 1925, l'escritor republicanu Emilio Palacios asoleyó, embaxo'l rótulu 'La tristez de mi tierra', y dientru la seición 'Antaño y hogaño', una estampa aldeaniega n'onde unos cantarinos populares que'l poeta siente actúen como detonante pa enxuiciar l'escaecimientu nel que tan arrequexándose los usos tradicionales. Enveredáu per un sentimientu de señaldá, l'autor esparde, dacuandu en tonu imprecatoriu, unes antitétiques considerances sol pasáu y el presente; nelles, decántase poles costumes decimonóniques, dalgunes nada pacífiques (les cuelmes de romería), y denuncia l'albandonu que padez la gaita nes dómines nes qu'escribe. El contraste ente lo vieyo y lo nuevo, y les formes d'ociu mozo, percuerren tol testu con ñidia desventaxa pa los tiempos modernos, calificaos d'amorales. Nun tando conforme con criticalos, llegará a apostar pol atrasu nuna comparanza alredor del fechu sexual nel que s'espeya, de fondu, un ciertu puritanismu.
El poema, dividíu en cincu estrofes asimétriques, dicía asina:
Guapinos cantares
los de la mió tierra,
qu'enllenaisme d'arumes el alma,
que me tais amusgando de llerza,
magar vos escluco
¿mió madre, entram'una pena,
que me caen les llarimines
i temblo como una fueya...!
Los mociquinos d'hogaño
non tienen pizca fachenda,
nin bailen les tres perrines,
nin van pintaila a la fiesta,
¿nin canten como cantaben
les tonaes de la tierra!,
nin se solmenen el cuayu,
ni a torgar hay quien s'atreva,
ni apurrise tarreñazos,
ni a romper una cibiella
so los llombos del contrariu...
«Asturies non ye quien yera
de cuando yo'ra rapaza»
-diz sospirando mió güela-.
Agora, los rapazacos
bailen solo a la organiella
o al son d'una banduca
d'eses que van pe la feria.
¿La gaita ta permalina
desque'l pueblu la disprecia!
No ta'nsiquiera colgada,
ta tirá tras de la puerta,
tan muda como calandria
que se xela na ñevera...
¿La probe qu'era nes fiestes
l'alegría de la aldea!...
Quieren más los rapazacos
pasar la noche de xuerga
nel diañu del Camaré,
o bailar e na verbiena
apretuxaos i'smolíos
como pexes en conserva;
¿cuándo se viera n'antaño
cosa igual? Dame virgüenza
en tansiquiera escrebilo:
¿Porconzones, qué decencia!
¿I a eso llamáis coltura
i aducación, so babiecas...?
I tocant'a los cantares,
¿mió probe i querida tierra!
mirai el que oyí cantar
ayer a una balboniega...
'En mi país no hay lluz'...
¿Enxamás l'hebo n'aldea
i fixeron casi a palpu
la más guapa cabraliega!
Guapinos cantares
los de la mió tierra,
¿quién vos oyó que vos oya
que señardades non sienta?
Cantares, que yeris
música melguera
por quien sospirando amores
el galán alexáu de so tierra
doliosu morría,
morría de pena...
Qué razón tevo mió güela:
«¿Ay, nietiquín de mió vida,
Asturies non ye quien yera!».
Publicidad
Publicidad
Te puede interesar
Publicidad
Publicidad
Reporta un error en esta noticia
Comentar es una ventaja exclusiva para suscriptores
¿Ya eres suscriptor?
Inicia sesiónNecesitas ser suscriptor para poder votar.