Trenta años na vida d'ún

'Alitar' cumple esti mes tres decenios d'esistencia marcaos pola defensa de la llingua, la lliteratura y la cultura asturianes

DECANU. Dellos exemplares de la historia del suplementu pioneru de la prensa en llingua asturiana. / JESÚS DÍAZ/
DECANU. Dellos exemplares de la historia del suplementu pioneru de la prensa en llingua asturiana. / JESÚS DÍAZ

'Alitar Asturies', la sección cultural veterana de la prensa asturiana, fai 30 años redondos de presencia ininterrumpida nes páxines d'EL COMERCIO: una voz n'asturianu que surde de Xixón pa Xixón, p'Asturies y, desque esiste internet, pa España y pal mundu. 'Alitar Asturies' ye frutu d'una sucesión d'esfuerzos personales y colectivos, xuníos al apueste qu'a esta sección-y dedicaron los sucesivos directores d'esti diariu. Ye verdá que trenta años ye una carrapotada de tiempu que merez un aniversariu, pero tamién ye verdá que nesta vida nada ye casual, y nesi sentíu nun puedo sentime sorprendíu, porque si hai coses que cumplen 30 años ye porque hai daquién trabayándoles con constancia, y ensin falsa modestia puedo dicir con arguyu qu'eso mesmo, trabayar con constancia, ye lo que ficimos los que-y dimos vida a 'Alitar Asturies'. Mánfer de la Llera y yo, fíu d'él, siempre tuviemos claro, y más a partir del so décimu aniversariu en 1988, qu'esta sección yera un fitu na historia pública de la nuestra llingua y de la prensa asturiana, y eso funcionaba como un aliciente pa siguir trabayando por ella como les formigues, migayina a migayina.

Pel añu 1978 el movimientu asturianista -el famosu Surdimientu- nun tenía más que tres años de vida, desque naciera l'asociación 'Conceyu Bable' nes páxines de la revista 'Asturias Semanal'. 'Conceyu Bable' implantóse en delles poblaciones d'Asturies, como Uviéu, Xixón, Avilés, Llangréu, Mieres, La Pola Siero y otres, onde había grupos de persones -mocedá na so mayoría- que suañaben con superar complexos y esparder l'usu normal de la llingua asturiana en toles actividaes sociales. Equí en Xixón funcionaba un grupu de 'Conceyu Bable' mui activu, onde había xente como Andrés Solar, Carlos Rubiera, Constante Álvarez, Dubardu Puente, Elena Fernández Poch, Enedina, Lluvisa Castro, Nel Ricardo Álvarez 'Nelo', Teresa González -a quien esti añu se-y dedica la Selmana de les Lletres-, Urbano Rodríguez, Vicente García Oliva, Xosé Lluis Carmona y Xuan Xosé Sánchez Vicente, ente otros. Había dos paisanos, que yeren Aquilino Fernández Abúlez 'Quilo' y mio pá, Manuel d'Andrés Fernández 'Mánfer'. Nos años anteriores, 'Conceyu Bable Xixón' llogró que la llingua asturiana tuvieren presente en dos medios de comunicación locales: en Radio Xixón con un programa tituláu 'Asturies na so cultura y na so llingua' y n'EL COMERCIO, con una sección titulada 'Estaya rexonal'.

'Estaya rexonal' tuvo un tiempu publicándose, y foi l'auténticu precedente de 'Alitar Asturies'. Nun momentu determináu, desapaeció. Nel añu 1978, la parte más moza de 'Conceyu Bable Xixón' decidiemos qu'había que recuperar la presencia del asturianu nel periódicu xixonés. Con éstes, axuntémonos un grupín, onde tábemos Rubiera, Constante, Nel Ricardo Álvarez, Andrés Solar y otros, y cuntémos-y la idea al director d'El Comercio, el recordáu Francisco Carantoña, proponiéndo-y una sección selmanal n'asturianu. Carantoña, que yera un home con una visión mui lliberal del asuntu llingüísticu, nun lo dudó: dixo que sí. ¿Qué nome-y poner? Nel Ricardo Álvarez dixo: 'Alitar Asturies', y asina-y quedó. Na testera púnxose una tira dibuxada por Muñiz, que foi'l distintivu de la sección hasta finales de los 90, cuando EL COMERCIO camudó la so imaxe, con Juan Mari Gastaca como nuevu director.

Nos primeros tiempos, la coordinación d'Alitar Asturies' funcionó como un trabayu n'andecha: repartíemonos los artículos y les ilustraciones, y llevábemosla a la redacción del periódicu. Pasáu un tiempu, y por comenencies diverses na vida de la xente, atopéme, casi ensin dame cuenta, con qu'Alitar Asturies' taba coordinándola yo solu, recibiendo, eso sí, collaboraciones más o menos fixes de los collacios de 'Conceyu Bable Xixón' y d'otres zones d'Asturies. La verdá ye que llevaba la so xera, porque la mayoría de les collaboraciones llegábente a mano y había que pasales a máquina. Había tamién que correxir munchos escritos. Esti estáu de coses duró hasta 1981. Había cróniques d'actualidá, artículos d'opinión, entrevistes, traducciones de pieces lliteraries, actualidá en llibros, llecciones d'asturianu y hasta tires humorístiques dibuxaes.

En 1981 tuvi que me treslladar a la Universidá de Lleón, y entós 'Alitar Asturies' quedó en manes de mio pá. Cuando m'incorporé a la Universidá d'Uviéu nel añu 1985, Mánfer siguió coordinando la sección, na que yo echaba un gabitu, mayormente con artículos de diversu tipu. La verdá ye qu'a mio pá prestába-y iguar lo que yá yeren daquella dos fueyes quincenales; siempre tuvo'l rixu d'escribir, y ye seguro qu'esos años 80 fueron decisivos, gracies a él, pa la continuidá de la sección. Ficiera fríu o calor, los artículos propios escribíalos primero a mano, con una lletra impecable d'escuela de los años 20, y cuando-y paecía que l'artículu yá taba curiosu, metíalu na rolla de la máquina d'escribir y poníase a calcar tecles. El tecléu d'aquella vieya Underwood y el golor de les celtas con filtru en ceniceru d'al llau, son la imaxe viva de toa una época en mio casa.

En 1991 el diariu EL COMERCIO recibió'l Premiu 'Andrés Solar', qu'otorga la Xunta pola Defensa de la Llingua, pola sección 'Alitar Asturies', siendo Francisco Carantoña quien lu recoyó nun actu celebráu nel Atenéu Obreru. Nesi mesmu añu, al morrer mio ma, volví a faceme cargu de la sección; y en 1996, al treslladame a vivir a Uviéu, 'Alitar Asturies' entamó a facese desde la capital. La informática yá taba presente nel mundu domésticu y periodísticu, pero por pexigueres técniques que nunca se pudieron iguar, l'usu del ordenador enxamás me privó de presentame físicamente na redacción d'EL COMERCIO a entregar el disquete y les ilustraciones pal 'Alitar Asturies', práctica de la que nun me llibré nin viviendo n'Uviéu.

Recambiu nel añu 2002

Nel añu 2002 les ocupaciones na Universidá d'Uviéu y nel mundu asturianista punxéronme difícil siguir cola sección, y amás facía falta un recambiu. Necesitaba daquién que tuviere capacidá y constancia pa dirixir la sección, y esi daquién foi'l profesor y filólogu candasín Xurde Fernández, que tomó'l relevu con entusiasmu. Foi un aciertu. D'entós p'acá, gracies a Xurde Fernández, Francisco Álvarez y Enrique Carballeira y, por supuestu, al enfotu de la dirección d'EL COMERCIO pola renovación de la sección, tengo que dicir qu'Alitar Asturies' ye muncho meyor qu'aquella que nos tocó facer. Compruébolo cuando repaso la colección completa del 'Alitar Asturies', que fuimos faciendo mio pá y yo y que guardo en casa como un incunable.

L'apegu que-y tengo a EL COMERCIO alita sobre manera los martes cada quince díes. Entós abro'l periódicu y voi directu a la sección de tola vida, con testera remocicada, imaxe moderna, conteníu atrayible y una camaretada de collaboradores d'alta calidá, onde tán Xuan Bello, Vanessa Gutiérrez, Berta Piñán y Xosé Lluis Campal. Y la verdá, préstame ver que la entrañable fueya d'aquel abril de 1978 ta más llozana que nunca, y que forma parte de la vida d'ún. Y entós, cuando echo la primer güeyada a los titulares, siempre me pasa lo mesmo: llégame, de dalguna parte, el tecléu llongueru d'una vieya Underwood y el golor d'unos 'celtas' con filtru nun ceniceru al llau. POR RAMÓN D'ÁNDRÉS / UVIÉU