El soberanismu social del 25 mayu

El 25 de mayu de 1808 prodúcense unos fechos trescendentales que pueden tener una llectura actual. Aquel día'l pueblu asturianu garra les riendes del so destín y autoorganízase alredor de la Xunta Xeneral, revitalizándola y activándola como representante del nuestru país; son precisamente les clases populares les que dan l'impulsu y protagonicen aquel momentu. La Xunta Xeneral declárase soberana y constitúise nel órganu supremu de representación y gobiernu d'Asturies, declara la guerra al imperiu napoleónicu y unvía embaxadores a Ingaterra pa pidir ayuda y reconocimientu. Amás, son dos muyeres quien se ponen a la cabeza d'aquel movimientu, pasando a la historia como figures centrales: Xuaca Bobela y Marica Andallón. Foi aquel un movimientu popular, d'empoderamientu y toma de conciencia asturiana qu'arrastró a tolos estamentos del país a embarcase naquella aventura. Otra manera, tamién ye nesi tiempu cuando se crea, a propuesta de Xovellanos, la bandera asturiana, que güei ta aceptada y querida pola inmensa mayoría de la sociedá. En definitiva, la fecha del 25Mayu representa ún de los fitos históricos asturianos, que marca la entrada del nuestru país na modernidá y nel qu'Asturies volvió a ser un suxetu políticu completu y estructuráu.

Aquel acontecimientu foi una especie de precedente de lo que podríamos calificar como soberanismu social, un conceptu políticu qu'asumimos dende Somos Asturies. Nesti sen, como dicimos nel nuestru manifiestu fundacional, facemos nuestra la idea de soberaníes: alimentaria, enerxética, comunicativa, financiera, industrial, mediática, cultural y política; teniendo como oxetivu la capacidá de la Xunta Xeneral y del Gobiernu Asturianu pa tomar decisiones concluyentes sobre toos aquellos asuntos qu'afecten al país. Eso ye pa nós defender la soberanía nel sieglu XXI, autogobernanos interrellacionándonos col restu del mundu, poniendo a la ciudadanía y los sos intereses penriba de too, afondando na democracia y na toma de decisiones colectives, recuperando la idea de la Europa de los pueblos frente a la del capital y la militarización.

La celebración d'aquel fechu históricu tien cada vez mayor relevancia social y institucional, pero ye necesario siguir aporfiando na so popularización y conocencia. Pa ello, proponemos la creación de les Medayes 25Mayu, destinaes a reconocer y premiar a toes aquelles persones o colectivos que se distinguieren pola defensa, estudiu o promoción de los valores y la identidá asturiana, abarcando tolos campos posibles. Unos gallardones institucionales que valdríen pa remarcar la relevancia d'esta fecha y que la dotaríen d'un elementu de prestixu importante.

El 25Mayu representa pasáu, presente y futuru d'Asturies; recuperemos el so espíritu y afondemos nes sos enseñances, repensémonos colectivamente y actuemos en consecuencia como asturianes y asturianos.