Clicks

Y nun se m'ocurre meyor sitiu que la Sala d'Arte del Centru Sociocultural de Les Vegues onde habitarán, hasta'l miércoles 16 d'abril los protagonistes de l'amuesa 'El ayer y el hoy de la Humanidad contada por los Clicks'. ¡Qué prestosada! Cuatro escenes (Xurásicu, Prehistoria, Edá Media y Edá Contemporánia) son como cuatro películines que cada visitante s'encarga de dirixir, guionizar… interpretar: Tiranosaurus Rex de dellos colores mirándomos amenazadores; Pterodáctilos, Tigres de Dientes de Sable, Mamuts, Caballeros medievales, xustes y pitances… Y esi achisbu de les ciudaes d'anguañu, el tráficu, les cases, los comercios… ¡Y hasta los parques acuáticos nún guiñu que los responsables (l'Asociación AsturClicks) fain al PACO corveranu).

Aprovecho que toi solu na sala pa viaxar per otros tiempos y espacios y p'atopame col neñu que m'habita qu'esfruta cuando son neños de verdá los qu'entren na sala nerviosos pa ver esos muñequinos que tan acabantes de cumplir los 50 años… Yera nel 1974 cuando Geobra, una empresa alemana sacaba los 'klicky' (pol ruidín que facíen cuando se conectaben les pieces). El gran Hans Beck diseñare esos 'Clicks', como al final foron reconocíos n'España desque equí salieren al mercáu nel 1976 (acompañaos de los «'Clacks', si yeren femes, anque al poco axuntáronse les dos denominaciones, nun faciendo distinción de xéneru nel llamáu comercial).

Tando neses, embaíu en plena máquina del tiempu, apaez Jorge, alma pater d'esta exposición, cola so cara d'inagotable neñu qu'esfruta compartiendo un xuéu qu'a toos mos afecta de la más guapa de les maneres. Los neños que nos habiten comparten anecdotarios.

Los clicks son una referencia estable en tiempos de mudanza ideolóxica, económica, sociocultural, en tiempos hostiles, mezquinos, crueles. Ellos siguen con esa sonrisa, col flequillazu, con esi pelo que tien esa fendidura circular pa poder pone-yos gorros…

Miramos pa la puerta de la Sala d'Arte, con miéu a salir d'esta tregua, d'esti cantu a la neñez. Nun sé qué disculpa buscamos, pero equí seguimos sentaos, deprendiendo de los clicks, allumaos pola so eterna, y nel fondu, esperanzadora sonrisa.