Alfonso (1)

Dolfo Camilo

Sábado, 10 de mayo 2025, 02:00

Siento amor por esi mes d'abril que ya nun ta. Cuando aporta déxome abrazar por él como pol más delicáu amante: más lluz, la ... natura españando, los brotos nos árboles, les alfombres de margarites, los catasoles asomando, espigando'l maíz… Dicin los que lo saben que la pallabra 'abril' vien del griegu 'aphrô', apócope del nome 'Aphrodita', diosa de la guapura, del amor y del sexu (¡que casi siempre se mos olvida… y asina mos va!) a quien se dedicaba esi mes… O tamién a la pallabra 'Aphro', 'espluma', que falaba de la mesma Afrodita y del mitu que recuerda que naciere de 'la espluma de la mar', espluma que nun yera otro que'l semen d'Uranu… ¿Sedrá por esto que los mitos clásicos y/o populares cásique nunca s'estudien nes escueles y facultaes? Otra teoría pa desplicar el nome d'Abril ye que vien del verbu llatín 'aperire' (Abrir), aludiendo a esa 'abertura' de la natura, siempre naciente.

Dami igual: les tres posibilidaes me presten y hasta pudiere ser una mezclienda de toes elles, más otra que se-y escapare al filólogu. Pa mín esti añu Abril vieno significáu por tres nomes propios (Alfonso, Paco, Pedro), tres amigos que, nel tiempu y nel espaciu me dieron fargataes de felicidá, placer éticu y estéticu.

Cronolóxicamente empiezo remembrando a Alfonso S. Suárez, productor, director y guionista audiovisual y compañeru nel Conseyu d'Alministración de la RTPA. Un creativu outsider, talentosu, independiente y radicalmente honestu, que lo mesmo tien fecho videoclip pa Bumbury que dirixío y producío esllumantes documentales como 'Voces en Imágenes'…

Ello ye que, a primeros d'Abril, sintí un podcast (disponible en plataformes d'audiu como RTVE.ES, APPLE o EL COMERCIO) de necesaria escucha y imperiosa recomendación: 'Mi nombre es John Ford', que guioniza y dirixe Alfonso con mano maestra. En menos de 36 minutos recrea en clave de ficción sonora, una histórica, por momentos histérica y siempre apasionante xuntanza de directores y guionistes de Hollywood que, nel mes d'ochobre del 1950, axuntaron pa determinar si roblaben, a propuesta de Cecil B. DeMille, una especie de xuramentu de llealtá al favor d'una América que santificaba la Cacia de Bruxes a la contra'l comunismu. Esa pretensión, con un final que nun vamos estripar, tuvo protagonistes y antagonistes tan egrexos como'l mesmu proponente, como Joseph L. Mankiewicz, o'l John Ford del títulu, toos ellos representaos (en guapísimu homenaxe) por míticos actores del doblaxe n'España.

La docuficción, un indiscutible thriller, arrespigome: lo bien escrita que ta, lo bien estructurada que ta y, sobremanera, la rellumante recreación d'un socedíu real traducíu de manera verosimil por ún de los meyores guionistes del país, que tendría ser d'escucha obligada nos centros educativos pola so fondura y una mirada cívica, digna, comprometida…

Radicalmente compartible nestos tiempos de fanatizada hostilidá a la contra de conceptos como Democracia, Respetu, Diversidá… Llibertá (A siguir).