Damián Barreiro Maceiras

Hai poco más d'un mes aportaben les dolioses nuncies de la muerte del economista David Rivas y de l'actriz Isabel Friera. Esti día ... la del periodista Damián Barreiro… Toos ellos egrexos y reconocibles asturfalantes, inxenuos defensores de la so manera de falar y de la manera falar de los sos antecesores. Los negacionistes de la llingua tán de norabona: muerren les palabres, muerren los falantes y muerren los alloriaos, repunantes y faltosos que defenden palabres y falantes… Ye cosa de ponese a esperar hasta que l'últimu d'ellos entre nel Tanatoriu y puean presumir, esos negacionistes en profecía autocumplida, qu'esa llingua efectivamente nun esiste. Selmana triste, muncho. Damián yera un asturianu d'A Estrada (Pontevedra), una persona que vivía tres d´una sorrisa, d´una mirada complíz, siempre empáticu, siempre esllumante, siempre en movimientu, como profesional de la información, como creador multireferencial. Con Damián xuncí rápido y bien y fuerte, anque mos viéremos menos de lo que mos prestare, dao que, al pesar de la diferencia d'edá, percorrimos paecíos caminos, paecíos intereses. Los dos amábemos les manifestaciones de la cultura popular del país y la so rellación colo 'pop' del restu del mundu. Damián Barreiro yera ún intelectual ayenu a la imaxe avieyada y rancia del intelectual del pasáu sieglu: nun yera un bustu parllante apoltronáu que viniere falar del so llibru, nun yera un habitante autocomplaciente de nenguna torre marfil, nun yera un pedante, inventor de pallabreros que dificultaren la comprensión de les coses, pa dase a valir… Por nun ser nin siquier yera un gafapasta. La humildá yera la so marca vital, la independencia de criteriu'l so marchamu, la valentía la so actitú, l'humor la so estratexa, la intelixencia la so táctica. La primer vez que supi d'él foi cuando trabayaba na mítica 'Les Noticies'. Concidimos depués en montonera espacios y situaciones: na manifa, pidiendo la oficialidá de la llingua, nel escenariu (tantes de veces él con esi proteicu Xune y los grandes Dixebra), na reflexón sobre cómo s'amosaba'l pueblu asturianu más p'allá del folklor… La mala nuncia ye que Damián ya nun va siguir actualizando esi esplendiosu discursu, esi corpus analíticu que ya avanzare, esa sorrisa… La bona ye que dexó obra ( ente más otro obres fundamentales pa entender el nuesu presente como colectivu y p'aldovinar pa onde pue dir (Caleya Sésamu: el papel de la televisión na tresmisión interxeneracional de la llingua; Asturploitation, Asturianía kitsch: decálogu de la cultura pop ástur) y una acordanza que nun vamos escaecer. Gracies Damián: qué grande yes y qué pequeños fais a los que te negaron.