Educación
Dolfo Camilo Díaz
Sábado, 31 de mayo 2025, 00:00
Tiempos convulsos nes aules. Los docentes, agotaos, dan con determinación un pasu y salin a la cai. Dicin basta. Lleo les 50 razones/reflexones pa ... dir a la güelga de la educación nel nuesu país y comparto hasta les que nun apaecen nesa rellación. Soliciten, ente más otro, un «decretu claru que regule la inclusión y l'atención a la diversidá». Pidin que «la figura del/a orientad@r se base en criterios cualitativos (necesidades reales de los centros) y non en criterios cuantitativos (númberu d'escolinos…)». Reclamen «auxiliares educativos en tolos centros». Proponen «revisar el sistema de detección inicial del alumnáu con altes capacidaes». Quieren «un marcu regulatoriu pa los centros d'educación especia». Y asina hasta 50 razones/reflexones que, según se deduz de la so lletura, o nun se cumplen bien o tan por cumplir.
Nun creo que naide con dos deos de frente y poco de bona voluntá s'oponga a esa batería argumental que redunda nún compartible (y necesariu) desiderátum: facer realidá esa idea d'un enseñu de calidá. Tando néses, y depués de meses de reclamaciones, peticiones, solicitúes a la Conseyería responsable, la inmensa mayor parte del profesoráu asturianu convoca güelga.
Conozo de cerca la realidá de la escuela n'Asturies, los sos oxetivos éxitos (podemos presumir argullosos de vivir núna comunidá puntera na educación); los sos oxetivos fracasos, munchos d'ellos resumíos neses cincuenta reflexones; y tamién les sos oxetives necesidades qu'empiecen por apoyar más y meyor (económica y materialmente) a esos profesionales que tienen ente les manes dalgo tan delicao y tan trescendente como son los 'miniciudadanos', los societarios d'un posible mundu meyor pal futuru.
Y por too ello nun soi quien a entender a los responsables de la Conseyería d'Educación o, perende, a los responsables d'un gobiernu asturianu parapetáu nún 'non' preventivu y neciu que, nin siquiera dende presupuestos puramente presupuestarios, tendría sintíu.
Como toi seguru (confío nos deos de les sos frentes y nes sos bones voluntaes) que presidente y conseyera tarán d'acuerdu cola inmensa mayor parte (si non con too) d'eses 50 reflexones/razones nun soi entender el por qué d'esti asurdu, brutal y doliosu desalcuentru.
Nun quiero recordar que l'esclavu que guiaba a los neños a la escuela yera'l 'Paedagogus', d'onde naz obviamente la pallabra pedagoxía. Y nun quiero recordar ello porque solo de mentalo arrespigo y siento esa tremenda pena por ver en pie de guerra a dos partes que sustancialmente tendríen de pensar y sintir lo mesmo… ¿O non?
El domingu vémonos na manifa.
¿Tienes una suscripción? Inicia sesión
Comentar es una ventaja exclusiva para suscriptores
¿Ya eres suscriptor?
Inicia sesiónNecesitas ser suscriptor para poder votar.