Diverses y valientes

Vivimos tiempos confusos, muncho. Millones de seres humanos, los más en pésimes situaciones vitales o económiques voten a Trump, a Meloni, a Orban… Dicía Santiago ... Carrillo, recoyendo un vieyu mantra de la izquierda pija del mayu francés, que «nun hai nada más tonto qu´un obreru de dereches» Y si, al endefectu, el probe que piensa que por arimase al ricu va ser ricu, nun dexa de ser un probe de pidir que, pa enriba, ye probe d´espíritu. Nun quita ello pa que, ensin salimos d´esti campu de reflexión, haya actitúes o acciones entovía más tontes. ¿Podría haber dalgo más tonto, precisamente, qu´un izquierdista piju? Sí, claro: qu´un partíu d´izquierdes faiga polítiques de dereches… Y si tiráremos d´esi filu posiblemente podríemos llegar a la rempuesta de «Qué pue haber más tonto?» y, sobremanera, de responder por qué nesti momentu la derecha (y sobremanera la derecha reaccionaria, la derecha autoritaria, la derecha ultranacionalista…) va xubiendo como la espluma (les más de les veces a la cuenta desnortiada d´obreros, d´ emigrantes…) y la presunta izquierda ya va aguantando l´aliendu ensin saber mui bien por qué nun-y llega l´aire a la boca… Tiempos crueles, asurdos, desquiciaos… Tiempos nos que Milei, por dir solo a ún de les sos últimos peos mentales (Vocis flatus), pretendió recuperar la terminoloxía d´hai cincuenta años pa (des)calificar a los discapacitaos intelectuales y rebaxalos a «Idiotes», «imbéciles» o «débiles mentales»… Tiempos que puen arrasar colos derechos que muyeres, el Coletivu LGTBIQ+ o esos mesmos y mansos obreros foron llogrando depués de muncha llucha.