Presidente desnudu

¿Qué va pasar el día que Pedro Sánchez tenga que dexar la Presidencia? (a cuenta la xusticia, a cuenta los votantes, da igual) ¿Mercaremos ... palomites y, sentaos en fardos de yerba, veremos a Feijoo y a Abascal festexar l´arrasamientu? Y esa visión posapocalíptica (ye lo que ye, na idea de que tamos viviendo agora l´Apocalipsis, que bien sabe ´l lletor atentu, y tamién l´atenta UCO, que significa «revelación») más nada significará l´arrasamientu d´unos cuantos derechos cívicos fundamentales llograos pola izquierda del país y la vuelta a la normalidá de que les grandes corporaciones, los grandes lobbys socioeconómicos y hazteoirrelixosos, sigan mandando y determinando la vida y la muerte de cada ciudadanu/a. Una debacle autocumplida desque´l PP ganó les elecciones pero non el Parllamentu, escaeciendo dafechu que núna democracia parllamentaria el pactu, el diálogu, el conveniu ente les fuerces representaes ye lo que cuenta y non el díxitu fríu del «machote» de turnu na nueche de les Elecciones… El PP nun aceptó esa derrota y, con furia infantil, empezó remover la mierda, nun importando qu´esa mierda pudiere chiscar al removedor. Nada d´ello pue sosprender dao que, al contrario, hubiere pasao lo mesmo. La idea de l´alternancia nesti país sigue teniendo unos puntucos histéricos y, dende l´apaición de VOX, con dramatismu guerracivilista. Pero ´l fechu de que la famosa y previsible fachosfera y los partíos conservadores y/o reaccionarios se punxeren como velutines por esa entente progresista que ta gobernando nun quita pa nada los mesmos errores d´un presidente tan brutalmente sobráu, tan maniobreru y tan trileru, tan pagáu pa él mesmu que nun ye quien, dende endemasiao tiempu, a entender la realidá. Acosáu por pactos inaceptables (como´l que mantien cola estremaderecha que representa JUNTS), acosáu por familiares y parientes con comportamientos poco aceptables, asediáu por chorizos puteros que foron de «megaamiguinos de veranu azul», acosáu y asediáu por él mesmu y esi calter sociopáticu que da n´antipáticu a poco que lu sientas. Güei naide nun paez recordase qu´esti xeniu del tactismu (gracies a les sos componendes con otru gurú del «Risk» como xuéu de cabecera como yera l´inefable y cansín Pablo Iglesias) cuasi acaba duplicando la presencia de parllamentarios de VOX nel 2019, elección a elección onde nun llegaben a un acuerdu onde repartise ministerios y vicepresidencies… Flipante. Güei, con un gobiernu degradáu, golpiáu por una corrupción qu´entemez amoralidá y cutreríu, con muncha aparente capacidá de diálogu con otres fuerces polítiques pero nenguna cola ciudadanía, va facese realidá ´l suañu húmidu de les fuercies reaccionaries cola inestimable ayuda d´un presidente desnudu y d´una camarilla que s´enfota en convencelu (Tezanos mediante) de que vistise de piel y sudu ye la última moda… y que Él marca tendencia