Trump-cismu

A naide se-y escapa que'l Fascismu foi, hai más d'un sieglu, esa manera ver el mundu afitáu nuna rixida disciplina, nel apegu a la cadena de mandu, nel hiperproteccionismu económicu, en tirar por un fuerte aparatu militar y pol afalagamientu de los valores castrenses y por afitar un nacionalismu victimizáu que pue traducise en violencia (bélica, económica, cultural…) a la contra de los que siñalen como enemigos. Esa violencia discursiva tamién s'amuesa n'actitúes d'autodefensa y ofensives racistes y xenófobes.

El Fascismu ye, en definitiva y dende presupuestos históricos, una idioloxía, una mentalidá, un movimientu políticu y una forma gobiernu de calter totalitariu, antidemocráticu, ultranacionalista y d'estrema derecha. Los sos oficiantes créense la mano de Dios y tienen un aquel mesiánicu y providencialista. A partir d'esta definición, que roza lo académico, cualisquier lletor/a podrá calificar o descalificar a Putin, a Orban o a Trump como bonamente quiera, pero con conocimientu de causa.

Pablo Iglesias Junior ye un escelente tertulianu: rápidu, informáu, coñón… Pero como políticu foi un cáncanu pa los propios y hasta pa los ayenos. Pablo Iglesias Jr., lo mesmo que los otros gurús podemites, entraben n'osesivu y infantil bucle llamando 'fascista' a cualisquier que nun comulgare colos sos dogmes.

Ellos son culpables másimos, de quitar a la palabra 'fascista' tola so carga descriptiva, peyorativa, despectiva… Ellos son los qu'axixaron el 'argullu de ser dereches' que los think tank del reaccionarismu patriu taben construyendo na segunda década del Sieglu XXI (Interecomonomía, Fundaciones Faes, Denaes, Disenso…)

Agora que tenemos al mandu de la mayor potencia económico-militar de la historia a un personaxe como Trump… ¿Cómo lu denominar, que realmente defina y desplique lo peligroso que pue ser, que ya ta siendo, pal devenir de la humanidá? El binomiu Trump-Elon Musk nun ye sustancial, ontolóxicamente, distintu al que podíen representar Hitler/Goebbels nos años 30. Y nun quiero dramatizar por demás, pero los pueblos tamién s'enquivoquen… Y unos mandatarios que puen planteyar esborrar, por dir a un solu casu, el xenocidiu qu'Israel ta faciendo en Gaza (con un pueblu atrapáu ente la llocura cruelmente tontilloca de Hamas y les sangrines vengances xudíes) col treslláu de los millones de maltrataos sobrevivientes pa onde ellos digan…

¿Cómo se pue calificar? Trump, más allá de lo friki de les sos maneres de ser y tar, ye'l mayor peligru al que nesti momentu s'enfrenta'l mundu… Mundu mayormente destremáu ente los interesaos y cobardes qu'aplauden al matarife y los interesaos y cobardes que callen, nun vaya ser… Agora la pelota (o'l dron) ta nel teyáu de los valientes que nun saben y nun contesten… ¿Hasta cuándo?