Apagón y alón

Namás con eso vamos poder dar, xuntos, el segundu pasu: nun esperar a que tolo solucionen los d'arriba; que va costar, ente otro porque bien nos presta bilordiar, siñalar culpables, echar cagamentucos, tomar dalgo y poner n'abertal les conspiraciones. Cuando lo que necesitamos son soluciones, espabilar, organizanos y atender les necesidaes primeres.

En faciendo too eso, tocaría conocer la verdá —más que nada pa que nun vuelva pasar— y por eso ye tan importante nun recudir nos prexuicios. Si pa entender esto aneciamos con que tolos progres, por definición, han tar a favor les renovables, lo público y lo guai, mientres que tola derechona ha ser amiga lo nuclear, lo privao y lo casposo, nun va haber manera d'aclarase. Ponme malu ver los dos relatos espardiéndose. Unos con que la culpa ye namás de la codicia los grandes operadores, y menos mal qu'el Gobiernu —español y progresista, por supuestu— nun taba comiendo, y qué bien que toles investigaciones tan en marcha, y venga paciencia pa conocer los resultaos, pero les renovables nun tienen culpa, y los que digan lo contrario mal, y mui bien el pueblu solidariu y tola culpa pa la derecha, la extrema y la mediopensionista.

Y enfrente los otros, con que tola culpa ye de los hipis del cambiu climáticu, y de los pijoprogres de Burseles que quieren acabar colos coches de verdá, el carbón, l'aceru y tola industria nuestro, y el Gobiernu —español y progresista, por supuestu— sabía de sobra tolo que venía; pero, como lo único que quieren ye siguir nel poder, tan acabando col dineru n'efectivu pa facenos más dependientes del cableríu y la internet, y yo ya nun sé ónde vamos dir a parar.

Pero, eso sí, nun queremos bateríes al par de casa. ¿Sí, non?