Los chiringuitos del bable

Nun descubro nada. Sidoro tien ganao premios y reconocimientos desque, con 'Pielgos de llercia' enseñara esa manera suya d'entemecer humor y drama. Igual porque, maestru y ilustrador, nunca-y quedó otro qu'empeñase en nun aburrir. Como fuere, tien agora un dominiu del idioma y del ritmu qu'engancha, merita y agabita. 'El fervinchu' foi la confirmación y, como digo, esta última de 'Dípteros' tienme naguando. Y nun voi a comisión: nestos tiempos enguedeyaos (polo menos pa min) tengo nos llibros míu un llugar onde posar, pensar y reir de manera. Y como cuento que munchos de los qu'amablemente lleen esta columna, nun son de tener en casa noveles n'asturianu (habralos que contarán que nin siquiera existe d'eso), y ya que llegaron hasta equí y tamos cansaos de tanta política y tanta economía y tanta tontería, van permitime que-yos abra esa puerta y-yos enseñe cuatru llectures. ¿Qué mal podemos facer? ¿Y a quién?

A naide. Y a eso voi: a recomenda-yos, aparte lo dicho, tres llectures prestoses: 'Memorial del monstru' d'Adolfo Camilo, 'Díes de munchu' d'Antón García o 'Incorrectos' de David Artime. Faiganme casu, nun les dexen pasar: son entretenidísimes, interesantísimes y de les de nun soltar. Y detrás voi dici-yos cuatru más qu'hasta tan traducíes al español: 'Como la muda al sol d'una llagartesa' de Berta Piñán, 'Crónica de la lluz y la solombra' d'Antón García, 'Hestoria universal de Paniceiros' de Xuan Bello y 'Nunca vencida' de David Guardado. Imprescindibles.

Y ye que, con tolo que se tien escrito nestos últimos años, y más p'atrás, buena rabia me da que tanta xente nin siquiera sepia lo que se ta perdiendo: que si lo del bable ye un inventu, que si la oficialidá nun sé cuánto y que si los chiringuitos nun se cómo. Cuando la única verdá ye que'l meyor sitiu pa disfrutar estes lletres nun son los chiringuitos: ye la tumbona.