Costo cero

¿O cuánto cuesta proclamar una república? ¿Y una monarquía? ¿O una dictadura? Pues eso: cero. Cero. Otra cosa sedrá, ya pa detrás, caltener eses instituciones y declaraciones: por dicir, Idi Amin salió carísimo; Amadeo de Saboya nun sé; y Donald Trump nun m'atrevo. Y atendiendo pa casos más nuestros: ¿Cuánto nos cuesta disponer d'un parlamentu? ¿Cuánto renta la Xunta Xeneral? ¿Y cuánto más valdría si fuere billingüe? Pues perdonen la obviedá, pero digo lo mesmo: cero. Ello ye, nada: proclamar que nel parlamentu asturianu los intervinientes puedan expresase nes llingües asturianes nun diba costar nada. Otro ye, claro, que dalgún marcianu anecie en disponer dafechu de traducción simultánia, torna obligatoria o otres faltosaes que tienen bien poco aquello porque les sesiones ya nun se trescriben, grábense.

Y si nun terminen de velo, apliquen la regla inversa. ¿Cuánto aforramos por tener un hemiciclu monolingüe? Nun invento nada: va nueve años, la nuestra diputada Mercedes Fernández enchipose de: «tener consiguío que'l castellanu seya la única llingua del parlamentu asturianu». ¿Da-yos más dicime, en perres, cuánto llevamos aforrao dende entós?

¿Y una alministración billingüe, cuánto cuesta? Pues lo mesmo: cero. ¿O mandase de dos llingües ye peor qu'aneciar nel monollingüismu? Siéntolo polos negacionistes, pero hai bien de funcionarios asturianos competentes ya en dos idiomes, igual qu'en dos sistemes operativos o en dos plataformes. Andar asustando con que por culpa la oficialidá vamos tener que contratar nun sé cuántos funcionarios más ye como aneciar en que la informática va facenos despedir a tolos que nun sepan programar.

¿Y los nomes de los pueblos? ¿Por qué cuesta más rotular L'Agüeria que La Hueria? ¿Sal más caro una televisión n'asturianu qu'una namás qu'en castellanu? ¿Editar un llibru, grabar un cantar, producir un programa, emitir un pod-cast o qué sé yo qué ye más gravoso na fala? ¿Una profesora de llingua cobra más qu'una de lliteratura, matemátiques, sociales, arte o cultura?

Faltosaes. Lo que tendríemos que tratar ye del costo de nun tener oficialidá. Y del beneficiu que diba traer.