La vía fiscal más nuestra

Con too y con ello, hai dalgo nesti pequeñu pasu fiscal pal nuestru executivu que podría acabar siendo un gran reblagu pa la humanidá. Pola primer vez na nuestra historia solidaria y socialista –heriedes que somos del Presidente Belarmino Tomás– los nuestros alministradores van asumiendo (pela vía de los fechos) que los tributos autonómicos tienen más utilidá que la namás pintoresca, redistributiva y políticamente correcta de quita-ylo al ricu pa da-ylo al probé, quita-ylo al empresariu pa da-ylo al trabayador, quita-ylo al trabayador pa da-ylo al paráu, quta-ylo al paráu pa da-ylo al inmigrante y quita-ylo al inmigrante pa da-ylo al dependiente.

Por descontao, siguen teniendo miéu al qué dirán y anúbrenlo too con un castigu a los más ricos. Pero queda claro que, pa esti gobiernu, los impuestos tamién pa otres coses: pa facilita-yos la vida a los contribuyentes, p'atraer inversiones, pa retener persones, y pa competir: «Esti Gobiernu, el d'unidá progresista y reformista, tien fecho posible qu'una familia, de clase media, con dos fíos pueda deducise hasta 2.100 euros y termine pagando n'Asturies 1.100 euros d'IRPF en cuenta los más de 2.000 que paguen en Galicia o Castiella y Llión». Palabra del nuestru Presidente.

Qu'a min –prácticu como soi– nun me parecen mal; como empiezu. Lo peor ye'l primer pasu y visto ya qu'aprovechar la vía fiscal (asturiana) ye un drechu, vamos acabar teniendo razón los que llevamos tanto aneciando con qu'aplicar nel nuestru pequeñu y verde país una política tributaria intelixente, coherente, competitiva y nada demagóxica ye la única manera de mirar pola sostenibilidá del nuestru sistema.

Y claro que podemos facelo meyor. Pero, si la muerte y los impuestos son lo único inevitable, toca racionalizar, dexar de rezar y pasar a l'acción.