Un fogonazu turbio con son de pop radical

Escritura desatada i - Cibercuchu

El mundiu del pasaomañana yá llegó

¿Nun t'enterasti?

Dafechu yá pasó y too. Foi bien curtia

la dómina del pospresente.

Ayeri decíen pola tele que diben clonar un paisano

y güei salió por internet una semeya:

resulta que tienen yá exércitos de cordobeyos, dellos

duros y llistos como la fame y preparaos pa faer la guerra.

Los foros de la rede dixital tán esfamiaos

porque naide s'alcordó, nos caberos tres microsegundos

de dir col cubu la esllava

dos puntu cero

comprimíu en zip, formatu puntu rar

pa da-yos el so místicu alimentu

a los animales menos iguales:

secretu mundial y magaya de bilordiu

con salsina de teoría y reducción avinagrada de

Moderna en vena

balsámicu trifásicu pa tracamundiate l'ánimu

¡y furrula!

Mal o bien, pero... Garantizáu

por Galería del Comisionista.

Zarro la conexión, que yá llegaron

los cordobeyos mecánicos

con rifles montaos y mires térmiques.

A la fin resultó cierto

y yo, riéndome...

Polo menos va quedame cara chiste

cuando fine esta semeya

y el vals del faltosu nun

tenga quién lu baile.

¿Alcuérdeste?

Cuantayá que nun te llevo pa la costa,

munchayá que nun me lleves tú a la mar

a ver les foles cariciar la oriella,

a sentir la espluma reburdiar,

a goler el sal nel aire siempres frescu la sablera y arrespiganos seliquino y al empar,

a pasiar en porrica y pigarciar depués tamién ensin vestir hasta que mos espierte, chiscándomos, l'atapecida

al fundise'l Sol, galdíu de trabayar pente les ñubes, nel océanu hiperactivu de la tarde;

y entós, con fríu yá, fuxir del sable húmedo

empobinando pasos hacia'l mundiu nuesu,

hacia la nueche amburante y ensin Lluna

hacia la bayura caldia, el llar d'amantes;

y si amanez guapo y entá mos garra na vixilia,

pídote que nun me dexes pa povisa,

llévame pal monte o pa cualquier prau:

bien sé yo qu'a ti échente de ver les flores

y a min, a min estráñenme los bichos.

Cuantayá que me dices (con razón) yá nun salimos munchayá que nun mos ven per'hí los catasoles.

Échenmos en falta, has sabelo,

dixéronmelo en suaños, hai yá tiempu:

nun supe qué diciyos na siesta d'aquel branu

y, por embargu, pensábalos aínda na seronda, espertando,

así qu'entrúgote a ti agora, metanes los rigores d'esti iviernu:

¿Tú…?

¿Tú alcuérdeste algo d'ellos?