«Interésame non la Historia, sinon los relatos que concasen con ella»
El narrador retrata l'Avilés caóticu y industrial de la so infancia na novela 'Tiempu d'escoria'
TTiempu d'escoria' ye la nueva novela de Xosé Nel Riesgo (Avilés, 1963) que ta a piques de publicar el sellu Trabe. Un relatu realista con muncho de la so propia alcordanza nel Avilés industrial de la so infancia.
-¿Ye esta una novela autobiográfica?
-Non, nun son les mios memories d'infancia. Ta ambientada na época que yo yera guaje al final de la dictadura, nun barriu que nun se noma, pero que ye'l de La Luz n'Avilés, onde me crié. Lóxicamente les propies alcordances afilvanen una hestoria que ye ficción, como'l personaxe de la madre: pensé na mía pero nun lo escribí como una manera de pasar el duelgu, sinón remembrando la mio vivencia naquel barriu onde un nenu descubre'l mundu. Son histories que si nun contaba yo nun diba facelo naide.
-Un procuru que sintieron otros autores de la so xeneración
-Escribióse muncho sobre la minería o el mundu campesín y seguramente queda abondo que contar tovía, pero non tanto de les condiciones nos que nos criamos nel tiempu de la industrialización escomanada d'Asturies. Namás no que foi Uninsa y Ensidesa falamos de varios miles de trabayadores. Les barriaes llevantáronse ente escombreres d'escoria o restos de cases tradicionales baltiaes nun terrén ensin urbanizar y ensin nengún control medioambiental. Yo de guaje tuve cólera infantil y tifus por contaminación con agues fecales del grifu, por dicir. Na llende'l barriu había chabolismu y al llau un mundu rural esbarrumbando. Pensé que too eso meritaba contase.
-¿Ye la realidá que descubre esi nenu?
-Nesi entós descubre una serie de misterios que namás va entender d'adultu al través de la memoria, que ye, como dixo l'historiador francés Pierre Nora, una construcción, non una reconstrucción. La mía ye una ficción pero los recuerdos son reales.
-En tola so obra, con distintes óptiques: el relatu negru, la sátira o el realismu, ¿l'estímulu ye la conciencia social?
-Interésame contar non la Historia, con mayúscules, sinón los relatos que concasen con ella, la memoria de lo cotidiano. Eso que Nathaly Zemon Davis llamaba la microhistoria y que ta n'obres como 'El regresu de Martin Guerre' o 'El quesu y los guxanos' de Carlo Ginzburg. A mi prestábame pensar que contribuyo a facer una microhistoria lliteraria al través de personaxes, mitá ficción y mitá reales, pa contar les condiciones económiques y sociales de la xente d'Asturies en determinaos momentos históricos. Nun puedo dexar de mirar al mínimu detalle lo que m'arrodia y poro, nun puedo ser más que pesimista.
-¿Tamién lo ye sobre'l futuru del asturianu? ¿Cómo valora'l momentu actual de la nuestra lliteratura?
-Na mio xeneración había como una obsesión por empaquétalo too: palabres, toponimia menor, cantares, sones, bailes... Yera como si tuviéramos pensando que diba cayer un meteoritu y facelo desapaecer too. Que salga xente mozo escribiendo apegaos a la realidá que viven ye una noticia bonísima, nun puedo más que velo de manera esperanzada y otru fenómenu mui positivu son les traducciones de clásicos vitales pa enganchar a la mocedá. Veo xente con talentu, dedicación y valía. Too eso normaliza socialmente la llingua y ye pa tirar volaores. De momento, podemos escaecenos del meteoritu (rises).
