Pancho Villa (1)

El 6 d'avientu de 1914, José Doroteo Arango Arámbula, Pancho Villa, entró a caballu na cafetería La Ópera de Ciudad de México y disparó al aire pa llamar l'atención de los presentes. A mi contómelo en primera persona'l 7 d'agostu de 1992 Guadalupe Ríos Montes de Oca, presente ellí nesi momentu hestóricu tomando un café col so padre, Arcadio Ríos, de la que me mostraba'l rastru d'aquel disparu nel techu. Doña Lupe, como yo la llamaba, yera madre de mio tía Josefina Ordóñez Ríos (tía Fifi), muyer de José Arias Álvarez (tíu Pepe) ún de los hermanos de mio madre.

Dos años más tarde, el 9 de marzu de 1916, al frente de les sos tropes, Pacho Villa invadía los Estaos Xuníos. Yera la primer vez qu'esti país yera invadíu. El choque recibe'l nome de Batalla de Columbus, porque tuviera llugar nun pequeñu pobláu d'esti nome nel estáu fronterizu de Nuevo México. Los Estaos Xuníos prepararon aína una 'expedición punitiva', encabezada pol xeneral John J. Pershing: un fracasu absolutu porque nun fueron quién a dar con él.

Pero, la hestoria que yo vengo a contar ye otra. Ente los 589 efectivos de la tropa invasora de Pancho Villa alcontrábase Alfredo Álvarez Arias, hermanu de les dos güeles míes, Estrella y Ángeles. Y la hestoria venía d'atrás, de cuando Pancho Villa tomó de rehenes a unos cuantos españoles nel estáu de Chihuahua pa pidir rescate por ellos, yá que s'entedía que formaben parte de la élite pudiente del país. Alfredo escapara de Cuba por un problema de faldes y súpose d'él como unos meses más tarde. Hacia final de la primavera de 1911, cuando más revuelto andaba l'ambiente per México entero, apareció una foto nos periódicos de Cuba na que se veía a Pancho Villa xunto a miembros de la so tropa depués de la toma de Ciudad Juárez. Por más que na foto fuera difícil de reconocer, pol bigotón, el sombreru mexicanu y les cananes alredor del cuerpu, el so hermanu Bartolo cayó na cuenta qu'ún de los de la foto nun podía ser otru qu'Alfredo. Polo menos yá sabíen per ónde taba.

Pa saber d'esta foto púnxeme en contactu col fondu fotográficu del Instituto Nacional de Antropología e Historia de México, que me remitieron a que podíen unviámela dixitalizada diversos fondos fotográficos privaos americanos o ingleses (como Alamy). Conservaba la nota tomada de l'alcordanza de mio padre de la fecha na que saliera na prensa la foto. Alfredo sedría'l segundu de la derecha, al delláu de Pancho Villa, l'únicu que posa con cierta chulería na foto. L'únicu que tien cara de teberganu con ganes de comer el mundu. Porque la so hestoria ye más llarga de contar y tiempu va haber pa ello.

• Temas
• Alitar Asturies