«Nun hai argumentu nesta novela porque la vida nun lu tien»

'La vida esplicada' ye la primer novela de Xosé Ignacio Pidal Montes (El Fadiellu, Bimenes, 1970), un autor billingüe de difícil clasificación y conocíu hasta agora pol so llabor poéticu en títulos como 'Nadie se salva' (Versos & Reversos), 'Ensin bones referencies' (Suburbia) o 'Parabellum en flor' (Best Books). Nella l'escritor yerbatu, criáu en Carbayín Altu, da espansión llibre a un caudalosu ríu de vivencies, alcordances o sueños con un pie na memoria tresmitida de los sos mayores y otru na de los viaxes, les andances pel monte, los llibros o los cantares encarnaos na so propia esperiencia vital cola mesma verdá. Hestories de presos, fugaos y enterraos en foses comunes de l'Asturies derrotada na guerra civil, relatos de mineros, muyeres campesines o paisanos de chigre, comparten nestes páxines espaciu con sones de The Pogues y los versos del Padre Galo, Xuan María Acebal o de los más diversos poetes de la tradición contemporánea.

Dende Noreña, el llugar onde vive anguañu, Pidal Montes fala del aldu que lu empobinó a embarcase nesta ópera prima en prosa: «Costóme porque la poesía compárola a una carrera de velocidá y la narrativa ye de fondu. De toles maneres, equí tengo un pie na poesía, como nun podía ser d'otra manera, y de fechu empieza con unos versos de la mexicana Irma Torregrosa nos que diz que so güela guardaba la sorrisa embaxo una piedra porque yera'l sitiu más fértil p'abellugala. Lleílos en Barcelona, onde fuera a presentar un llibru y vi que teníen de ser l'empiezu de dalgo. Tuvi rucándolo años hasta que me punxe con ello», relata. En cuantes al títulu, tamién se desvela nes primeres llinies: «La novela escomienza afirmando que lo meyor de los güelos ye que te dexen la vida esplicada. A partir d'ehí, principia un filu que nun tien argumentu, porque la vida nun lu tien. Yo escribo sobre lo vivio y lo lleío», espresa.

El narrador afonda na flebe rede qu'estrema na so obra ficción o esperiencia verídica: «Gústame muncho el realismu máxicu y, cuando escribo, hai veces que nun sé si lo que cuento ye verdá o mentira, inda nesta novela hai muncha realidá. Nunca ye tarde pa que la veas de frente. Mio güelu fue milicianu anarquista na guerra, siempre supimos que pasó prixón, pero, al través d'un amigu historiador, llegamos al archivu históricu de Ferrol y ellí aparecieron los papeles orixinales de él, ver la so firma orixinal, enfrentate a eso o dir a ver los campos de concentración onde tuviere mio bisgüelu maternu de Bimenes, en As Figueiras o Celanova, llegues ende y caite l'alma a los pies. La realidá tien la capacidá de golpéate d'esa manera», caltién.

Pidal Montes ta d'alcuerdu con otra cita que remembra na so novela, esta de Mario Benedetti: «L'escaezu ta enllenu de memoria». Nesa aparente contradición dialéctica afayó l'estímulu pa poner negro enriba blanco: «Tolo que tenía guardao, non como rencor, como enseñanza, yeren munches les hestories que merecíen ser contaes, les d'esa xeneración de mozos que vivieron la guerra civil y que fue cepillada entera, de mio güelu cuando tuvo dir desenterrar coles sos manes a so padre na mina, los amigos míos que quedaron en camín pola droga o tamién otres más prestoses como la del trompetista d'oru, un paisanu que tocó nes meyores orquestes d'equí y de Sudamérica y que-y llamaben asina porque tenía l'instrumentu bañáu n'oru: parez una fábula pero esistió, yo conocílu», apunta alrodiu d'una novela que tien muncho d'ensayu n'abertal y d'emoción «a pechu descubiertu».

El propiu autor reconozse «peculiar y un escritor al que nun-y gusta doblegase, ente comines». Fiel a ello confiesa que «lo único que-yos pidí a los editores ye que la novela nun se vendiere nes plataformes, sinón nes llibreríes de tola vida». Nuna d'elles, La Buena Letra de Xixón, va presentar el so llibru mañana miércoles a les 20 hores.

Temas

• Alitar Asturies