Memoria encesa d'un herue de la resistencia

El polesu Vicente García Riestra (1925-2019) foi l'últimu superviviente asturianu del campu de concentración de Buchenwald y ún de los postreros testigos que pudieron narrar en primer persona l'horror nazi. Fuxíu d'Asturies, siendo malpenes un rapacín, tres l'asesinatu de so padre y del so hermanu, pasó a Cataluña y después a Francia, onde s'integró na Resistencia y n'onde lu garraron presu los alemanes pa deportalu al campu, cercanu a Weimar ú tuvieran internaos miles de republicanos españoles. Tres la muerte de Franco, viaxó a Asturies delles veces, una de les últimes pa presentar el llibru qu'escribió sobre les sos vivencies Xuan Santori, '42.553. Depués de Buchenwald', y allegase a varios institutos relatando la so hestoria. El cineasta y artista gráficu Alberto Vázquez García (Mieres, 1973) documentó cola so cámara esa y otres visites, como'l testimoniu de García Riestra na so casa francesa de Périgueux. El resultáu d'esi trabayu, arriquecíu con otres entrevistes, ye'l llargometraxe documental que presenta a competición nel FICX, dientro'l ciclu Esbilla, una obra que tresciende'l valir testimonial y hestóricu pa ufiertar un relatu tan directu como emocionante.

La película ufre arriendes un estraordinariu retratu de la personalidá d'esti herue de la resistencia antifascista, cola llucidez y la integridá política que caltuvo hasta'l final de la so vida. Vázquez García amuésalu asina, faciendo que rescample la verdá de les palabres y qu'algame al espectador una hestoria que nun tenía d'olvidase nunca.