Borrar
Un grupo de visitantes na plaza del Marqués, punto de partida de les rutes polos misterios de Xixón. Joaquín Pañeda
Visites guiaes n'asturianu pa conocer la verdadera hestoria

Visites guiaes n'asturianu pa conocer la verdadera hestoria

La iniaciativa 'Xixón mete mieu' empobina per diversos escenarios reales de Cimavilla y al so alrodiu conducida por Arantza Margolles

p. a. marín estrada

Martes, 18 de agosto 2020, 01:15

Necesitas ser suscriptor para acceder a esta funcionalidad.

Compartir

Una manera prestosa de cuntar la memoria d'una ciudá al través de fechos reales que sucedieron nella y que col tiempu acabaron por algamar l'arniu d'auténtiques lleendes urbanes, ye'l propósitu de les visites guiaes n'asturianu que conduz per segundu añu la hestoriadora y collaboradora d'esti periódicu, Arantza Margolles y qu'empobinen la plataforma Ver Asturries y Cuatro Gotes Producciones embaxo'l títulu de 'Xixón mete mieu'.

La iniciativa cuenta col sofitu de la Oficina de Política Llingüística del conceyu xixonés y según desplica la so guía: «Volvemos a facela después del ésitu que tuvo la edición anterior, na que llegaron siguiles unes 500 persones». El perfil de los participantes ye variáu, con predominiu de xente local, inda la presencia de visitantes de fuera d'Asturies abulta curiosa: «Ye dalgo que nos soprendió gratamente l'añu pasáu nel qu'hubo un porcentaxe importante de turistes madrileños, catalanes o andaluces. Al empiezu de les visites avezamos alvertir que si dalguién nun entiende lo que vamos falar podemos face-y en momentu la traducción simultania, pero hasta agora enxamás tuvimos nengún casu. La xente sigui les desplicaciones n'asturianu ensin problema y foi un descubrimientu bien prestosu», afirma Margolles. Nesi sen, desvela que dellos d'estos visitantes confesaron ente los motivos p'apuntase a l'actividá «aparte del interés pol propiu conteníu de misteriu yera pola la posibilidá de poder facer una visita sintiendo la llingua asturiana, dalgo, que sigún cuntaben, nun tuvieran ocasión de llograr na so estancia equí. Nun hai dulda de que'l fechu diferencial de la llingua ye atractivu y díbamos ganar abondo si hubiere más actividades pa satisfaer esa demanda cola que munchos turistes vienen a Asturies», caltién.

La visita percuerre dellos escenarios del barriu Cimavilla y el so alrodiu, escoyíos pol so significáu hestóricu o porque nellos asocediera dalgún socesu lo bastante impactante como p'acabar incorporáu al imaxinariu popular de lo lexendario. Talo revela la responsable de guiar la ruta: «Ponemos l'acentu en que tolo que vamos cuntar asocedió de verdá d'una forma o otra, porque munches veces vincúlase'l misteriu al 'van cuntame un cuentu', dalgo que nun ye cierto. Nosotros relatamos hestories de pantames pero siempre hasta onde sabemos que pueden tar bases en fechu reales». Ye lo que sucede cola bisarma de l'antigua Tabacalera: «Evidentemente ye una broma que gastaben les cigarreres veteranes a les novates pa mete-yos mieu pero tien munchos venceyos cola propia hestoria del sitiu. Falaben d'una muyer de prieto que percorría l'antigu conventu como perdida y esa figura imaxinaria correspuéndese cuasi dafechu cola monxa fundadora, María de Santo Tomé, que morrió ensin ver rematáu l'edificiu. Toles hestories que cuntamos tan sacaes d'hemeroteques, como la de EL COMERCIO, de documentos o de la tradición oral, pero siempre contrastada cola propia realidá», detalla.

Pa Arantza Margolles l'escenariu «más guapu y visual nel que paramos ye a los pies de la Torre del Reló. Anguaño ye l'archivu municipal, pero antiguamente foi cárcel y ehí relatamos les fuxíes sonaes qu'hubo de presos o ponémoslo en relación con un fechu que se conserva nun documentu de la Inquisición nel que s'espón el casu d'una muyer de Xove, medio bruxa-medio vampiru, qu'acabaron lliberando absuelta». Otra de les paraes de la ruta ye la rampla del Muro enfrente l'Antigua Pescadería pa remembrar el casu de la Dama de Negro: «Otru sucesu real, nesti casu el d'un infanticidiu cometíu en 1908 por una madre qu'impresionó tanto a la xente qu'acabó xenerando una llenda, y selmanes después, nun para d'haber avistamientos de muyeres de prieto con supuestos cadabres per tolos barrios de Xixón».

L'asesinatu de Rambal tamién tien el so sitiu nesta ruta y con él l'alcordanza de la Cimavilla vieya o el contestu social nel que se desenvolvieron más d'un sieglu los llamaos 'crímenes de tabierna' «Queremos amosar que nun hai hestories pequeñes y qu'estes tamién valen pa conocer la hestoria d'un llugar», conclúi Arantza Margolles.

Publicidad

Publicidad

Publicidad

Publicidad

Reporta un error en esta noticia

* Campos obligatorios