Seronda granible pa la lliteratura en llingua asturiana

Otra figura hestórica de la investigación llingüística y tamién del movimientu reivindicativu pol asturiano, Xosé Lluis García Arias, recueye nun prestosu volume otra interesante aportación al xéneru autobiográficu y a la lliteratura de viaxe: 'Pel Camín de la Mesa'. L'ex presidente de l'Academia de la Llingua recueye nél, arriquecíes, una serie de cróniques andariegues pelos montes de la so Teberga natal que vieran la lluz enantes na prensa asturiana y agora devuélvennos la oportunidá d'esfrutar de la so escrita más personal, na que nun falta la observación crítica de la realidá y del entornu.

Más nomes imprescindibles, nesti casu, de les xeneraciones inmediatamente posteriores a la segunda del Surdimientu, vienen xuntase a esti enfotáu enanchamientu de la colección 'Incla Interior' de la editorial uvieína. Asina, Pablo Texón Castañón, a pocos meses de ganar otra vuelta el premiu de poesía Xuan María Acebal con 'Cantar de ti mesma', publica agora 'Proust nel Monte Alende. Cincuenta pieces de prosa miscelánea'. Con una trayectoria prácticamente volcada na creación poética, l'alleranu amuésanos ende la so calidá y pericia como articulista, esmeráu divagador y atentu fabulador de realidaes propies o ayenes. El resultáu un sabrosu ensayu alrodiu de les conexones intelectuales y vitales que xunen l'oficiu d'escribir en cualquier llingua a les ambiciones de la lliteratura universal.

Otru autor, de xuro el más prolíficu y premiáu de la so promoción, José Ángel Gayol, cola tinta inda fresco de la so última novela 'La xeometría secreta del azar', apurre a les llibreríes una nueva obra narrativa: 'Los cuerpos celestes'. Nesta ocasión, el mierense escueye la forma del relatu pa reunir diez pieces d'estremaes fechures nes qu'escampla con mano maestra la so facultá p'afondar nes posibilidaes estétiques de la ficción realista. El conxuntu ufre cola esposición de les diferentes hestories una visión áceda y sumamente amañosa del universu social nel que trescurren les nuestres vides metanes un tiempu que non siempre somos a entender na so esbariadiza complexidá.

A estos títulos d'aliendu lliterariu, suma Trabe un volume de filoloxía práctica llamáu a convertise nuna ferramienta d'usu indispensable pa escritores, docentes, profesionales o falantes en xeneral, el 'Diccionariu de consultes llingüístiques del asturianu' del profesor Ramón d'Andrés Díaz. Otru llibru que tampoco puede faltar na biblioteca de nengún especialista del nuestru idioma ye'l tomu publicáu pola Academia de la Llingua como homenaxe a la que fuera la so presidenta, la caderalga Ana Cano: 'Llingua, tierra, nomes. Estudios d'onomástica asturiana (1987-2017)', que xunta la impagable xera de la llingüista somedana como estudiosa del asturianu.

La llectura de puru pruyimientu tien arriendes otres novedaes a les que solapó la so salida nel pasáu branu como la novela 'Pielgos de llercia' (Impronta) de Sidoro Villa Costales, una divertida narración policiaca desenvuelta cola gustosa frescura del llinguaxe propiu del escritor sierense, amu d'un particular microcosmos imaxinativu. Pintar Pintar cuenta colos más mozos apurriéndo-yos 'Prau' de Daniel García Granda, ilustráu por Esher Sánchez. Tamién les traducciones de clásicos empobinaos a llectores de toles edaes acuten el so sitiu na collecha serondiega como 'El xenial Don Raposu' de Roald Dahl, vertíu por Nicolás Bardio o 'El vampiru pequeñín' d'Angela Sommer-Bodenburg, en torna de Miguel Isla Viesca, entrambos dos editaos pol sellu Radagast. A ellos xúntase una nueva entrega d'Asterix: 'Asterix y el grifu', traducida por Xesús González Pato.