Fascinante Mardom

Toi con Les Luthiers cuando dicin que cualesquier tiempu pasáu... foi anterior. Non meyor, non más perfectu. Ye mentira. Veo ente'l públicu bien de xente mozo, tamién de xente mayor que lleguen aconseyaos pol rapacín que-yos vive dientru. La edá ye un sentimientu o eso debiere ser, anque munchos namás que lleguen al resentimientu... Y nun ye bono.

Prestome 'Asíncronos', un curtiu que podría (y debería: material hai pa ello) de dar en llargu. Mardom dirixe, Lucía López guioniza, Ruben Arena lleva la fotografía y asina hasta mediucentenar de creativos (actores, técnicos...). Falla la voz nesta preestrena: los fondos tan perriba de los personaxes... Pero tolo demás son aciertos. Una historia madura, bien cuntada, bien planificada (escelente momentu 'dios'; escelente contrapicao dende un vieyu reló paráu a Olaya llorosa y angustiada, la protagonista, que presiente que la so historia d'amor llega al final; escelente historia de desalcuentros, d'amor a distancia que nun s'aguanta, de pasiones a destiempu...), con una fotografía trabayada y con una banda sonora potente. Banda sonora que firma Mardom.

¿Y quién ye Mardom?: Nacho García, proteicu renacentista asíncronu... Guitarrista, voz, compositor, alma pater d'un proyectu integral y ambiciosu. Mardom tien discursu fílmicu y tien discursu musical. Mardom tien una formación competente onde destaca la increíble voz d'Alba y una esbilla de temes (Vuelvo a ser Yo, Torre de Babel, Polvo...) que tienen de dar en temazu si hai dalgo paecío a la poética xusticia de reconocer el trabayu, la sensibilidá y la intelixencia.

Un manifiestu mozu, pero arrespigantemente maduru. Si tenéis oportunidá face-yos siguimientu. Mardom, al llau del corazón (nun tien pérdida).