Unes Lletres con muncho y bono onde elexir

Collecha editorial. Na gran fiesta de la lliteratura asturiana les llibreríes saquen a la cai un añu más les últimes novedaes na nuestra llingua

Gijón

Viernes, 5 de mayo 2023, 20:49

Comenta

Como'l milagru real de la flor nos pumares, cada primer viernes de mayu repítese n'Asturies un acontecimientu del que siempre presta dar cuenta. Esi día los llibros editaos nes nuestres llingües salen a la cai na busca d'esos llectores pocos o munchos pa los que s'escribieron. Y cada xornada de les Lletres vien a confirmar un secretu a voces de cuantayá: que la lliteratura n'asturianu y n'eonaviego ufierta güei propuestes tan variaes o prestoses como'l gustu de los sos destinatarios. Dende les páxines de CULTURAS brindamos güei una posible guía pa escoyer ente los títulos más recientes desplegaos nos puestos al aire de les llibreríes y el so guiñu a disfrutalos col ya tradicional 15 por cientu de descuentu. Convidámoslos tamién a escaciplar nellos otres llectures igual de provechoses que pudieren quedar fuera d'esti recuentu.

La narrativa ye una puerta afayadiza pela qu'entrar a descubrir les nuestres lletres pa quien inda nun tenga el vezu de facelo o pa que los llectores habituales seyan a ponese al día en novedaes. 'El valle encesu' (Trabe), la nueva novela del prolíficu Gonzalo G. Barreñada, o la última del veteranu Vicente García Oliva, 'Los tordos' (Hoja de Lata), son dos opciones igual de suxestives, como l'acabante publicar 'Víes' (Trabe), d'Helena Trexu, o un títulu na llingua del Navia-Eo pa tolos públicos que permite trazar múltiples histories: 'El xogo sin fin' (ALLA), de Ricardo Saavedra. D'asemeyáu interés son los relatos de 'Cómo yéramos' (Trabe), de Xuan Xosé Sánchez Vicente, o pa los siguidores de la novela gráfica, la premiada 'Paez que nun foi ayeri' (Trabe), d'Ángel de la Calle.

Los anaqueles de la lliteratura universal traducida a la llingua asturiana siguen enllenándose con nuevos clásicos, ente los que resalten 'Sherlock Holmes. El misteriu de la razón', d'Arthur Conan Doyle en versión de Xaime Martínez, o entrambes xoyes de tolos tiempos como 'Roméu y Xulieta' (Cuatro Gotes), de William Shakespeare, o 'Los viaxes de Gulliver' (Radagast), de Jonathan Swift, debíes al llabor de Víctor Suárez. La poesía trai en tinta fresco les obres reuníes de dos nomes mayores de les nuestres lletres y a los que se rinde homenaxe nes d'esta edición: 'Cola suavidá del aire' (Impronta), de Xosé Bolado, y 'Coles señes del agua' (Baxamar), de la Premiu Nacional de Lliteratura Lourdes Álvarez. Tamién el caberu poemariu d'otru autor históricu, Carlos Rubiera, acabante asoleyar 'Memoria del futuru' (Trabe).

Noticia Relacionada

'Glaudius' y Bolado, los llibros regalu

Un xéneru que calibra la cierta normalidá de la creación lliteraria n'asturianu ye l'ensayu y ente les novedaes que puen valir como exemplu del so altor intelectual tán 'Una ciencia sin enfotu' (Trabe), del llingüista Ramón d'Andrés, cola qu'algamó el Premiu Máximo Fuertes Acebedo en 2022. Al so llau, 'Un tesoru y una tumba' (Impronta), la última entrega del diariu d'un cineasta de Ramón Lluis Bande o la recientísima 'Nunca vencida' (La Fabriquina), del nuevu académicu de la Llingua, David Guardado. Y, nel capítulu de les obres colectives, sobresal la 'Antoloxía Pésica de lliteratura contemporánea' (Llibros de Nós), una recopilación d'autores del occidente asturianu y el noroeste lleonés fecha por Roberto González-Quevedo.

Granible ye la estaya d'obres destinaes al públicu infantil y xuvenil. Nella narraciones que tamién pueden presta-y a los llectores de cualaquier edá como 'Boliescritu de primavera' (Impronta), de Xilberto Llano, premiada col María Xosefa Canellada, o 'Los Maliayos na boca la ballena' (Delallama), de Beatriz Rato Rionda. A la xente más menudo pueden pruyí-y obrines como 'Tol cielu va ser tuyu' (Pintar Pintar), d'Alberto Menéndez ya illustraciones de Bergmont; 'El fantásticu viaxe de Selene' (Vtp), de María Luz Pontón, Pilar Sánchez Vicente y Alba Fernández; 'Los cinco criaos del Príncipe' (Impronta) de los hermanos Grimm, illustráu por María Perera; 'Los páxaros' (Pintar Pintar), d'Ivana Castañón y Emilia Conesa, o 'Bruxa' (Pintar Pintar) de Pablo Fraile y Antonio Acebal. Muncho y bono onde elexir.