L'Academia de la Llingua presenta el Congresu Mundial de Cultura asturiana

Esta selmana l'Academia de la Llingua presentaba el Congresu Mundial de Cultura Asturiana (CMCA25), entamáu cola collaboración de la Universidá d'Uviéu y la Conseyería de Cultura. Va cellebrase ente'l 4 y el 7 de febreru nel Edificiu Históricu de la Universidá y ufierta un programa con alredor de 60 contribuciones académiques. Amás de siete conferencies plenaries al cargu d'antropólogos con impautu internacional, el CMCA25 ufierta más de mediu cientu de ponencies en dos meses simultánees, una esposición y dellos actos protocolarios como la inauguración, na biblioteca central, col rector de la Universidá y del presidente del Gobiernu del Principáu.

El congresu va entamar con una conferencia de Paz Moreno Feliu (UNED) titulada 'Encruciyaes de l'antropoloxía' y a lo llargo d'estos cuatro díes van ller les sos ponencies especialistes como l'etnomúsicologu Hector Braga, el filólogu David Guardado, l'antropóloga Fe Santoveña , el sociólogu Vicente Riesgo Alonso, l'economista Xosé Alba, l'historiador Javier Fernández Conde, el xurista Nicolás Bartolomé o el director del Muséu del Pueblu d'Asturies, Juaco López, amás d'espertos internacionales como les arxentines Susana Markendorf y Mónica Lacarrieu, la norteamericana Gwyneira Isaac, el francés Laurent Fournier o la mexicana Martha Judith Sánchez. Al empar, nel congresu, presidíu pol antropólogu Roberto González-Quevedo, va entamase un homenaxe al desaparecíu economista y académicu de la Llingua, David Rivas Infante.

Temas

• Alitar Asturies