«Ye una historia escrita en futuru pa que naide la escaeza»

«La madre, la fía grande y la fía pequeña tarán cosiendo, clavarán l'aguya a vegaes, amestaráse nes prendes el so sangre col sangre les firíes que'l padre y el neñu trayíen nes ropes de la mina, y siguirán cosiendo, mindiando pa que la ropa dure más. El padre verá meyor pero tará cansu, cansu de les xornaes eternes o de la nada, cansu de tanta inxusticia, de tantos muertos a cambiu les ganancies del patrón, de tantos palos, de tantu sudor pa namás saber del pan de la fame». Son llinies estraíes de la novela 'Una Casa' del escritor Xurde Álvarez (Sama, Llangréu 1973), la historia d'una familia minera real de la posguerra que quier ufiertar amás del retratu d'un tiempu de miseria y silenciu, la esperiencia vital d'un miembru de la Brigada de Salvamentu -el propiu güelu del autor- y de los rescates nos que tuvo d'intervenir a lo llargo de los sos dieciséis años de serviciu, un reflexu de les inhumanes condiciones de llabor de los trabayadores de los pozos y de la traxedia como episodiu cotidianu de les sos xornaes.

«Hai un datu que lo diz too: dende 1941 a 1959 matáronse 1.541 mineros, pero esos son los oficiales, el Réxime facía lo posible por que nun trescendieran toos pa evitar revueltes. De la que mio güelu empezó había díes que teníen de facer hasta dos o tres salíes y daquella, nun accidente lo avezao yera que los mesmos trabayadores del pozu s'ocuparen del rescate, namás llamaben a la Brigada cuando la cosa yera ya mui grave y la mayoría de les sos intervenciones yeren pa sacar los muertos», desplica Álvarez alrodiu d'ún de los exes de la so narración. El llibru qu'agora ve la lluz escomenzó a escribílu con 18 años pañando les notes autobiográfiques que fuera recoyendo so güelu, Alfredo Fernández Roces, y el testu definitivu, retomáu cásique dos décades después, desvela l'autor que «llegó a tener cinco versiones distintes». De metanes un ardu llabor de rescritura y munches hores de documentación: «Sicasí nun resulta fácil ponese a investigar nos archivos qu'hai, como el llamáu Históricu d'Hunosa, munchu material nun se dexa consultar o ta directamente tapecío», llamenta'l novelista.

«Ye una historia escrita en futuru pa que naide lo escaeza y evité dar nomes o feches por razones obvies: son traxedies reales, y a la fin quería que pudiera lleese como una novela, qu'anque describa una época pueda ser eterna, por dicir», revela Álvarez. Una de les sos esmoliciones foi l'emplegu del llinguaxe mineru: «Non namás los tecnicismos, pal que nunca tuvo dientro ye difícil qu'imaxine lo que ye una rampla, un tayu o una serie y tamién tresmitilo a un públicu xeneral». Sicasí, el textu agora asoleyáu, cuntó coles correcciones feches por so güelu Alfredo enantes de fallecer. Nunos díes la novela va presentase na Sociedá La Montera de Sama. Va ser el prósimu viernes 26, de la mano de Juan Fernández, 'Juanín', inxenieru técnicu de la Brigada de Salvamentu Mineru.

Temas

• Alitar Asturies